Дыягназ – гэта не кропка. 21 мая – Міжнародны дзень памяці людзей, якія памерлі ад СНІДу

Упершыню акцыя прайшла ў Сан-Францыска ў 1983 годзе. Тады яшчэ складана было прадказаць маштабы глабальнай эпідэміі ВІЧ-інфекцыі, у свеце было зарэгістравана толькі некалькі тысяч выпадкаў захворвання, пра якое практычна нічога не ведалі.    Сёння з ВІЧ жывуць 37 мільёнаў чалавек. Ад хвароб,                           звязаных са СНІДам, у свеце памерла больш за 35 мільёнаў чалавек.

Мэта Дня памяці – павысіць свядомасць і выкараніць стэрэатыпы, звязаныя з ВІЧ/СНІД, падтрымаць тых, у каго дыягнаставана гэтая хвароба, з’яднаць людзей, каб паменшыць наступствы і распаўсюджванне захворвання.

У  Беларусі зарэгістравана 22827 выпадкаў ВІЧ- інфекцыі. За 3 месяцы 2017 года выяўлена 609 інфіцыраваных. За ўвесь перыяд назірання з    1987 года ў краіне памерла 5079 чалавек.

У Брэсцкай вобласці на   1 красавіка зарэгістравана 1760 выпадкаў ВІЧ-інфекцыі, прычым, з пачатку года выяўлена  47 новых.

Найбольшая колькасць хворых – у Пінску (772 выпадкі), Брэсце (251), Баранавічах і раёне (170),  Лунінецкім раёне (110).

У Ляхавіцкім раёне зарэгістравана 12 выпадкаў ВІЧ-інфекцыі, 1 – выяўлены сёлета.

Асноўны шлях перадачы інфекцыі – сексуальныя кантакты (амаль 90 працэнтаў выпадкаў), акрамя таго хвароба перадаецца праз ін’екцыйнае ўвядзенне наркотыкаў. У Ляхавіцкім раёне ўсе інфіцыраваныя вірусам імунадэфіцыту чалавека заразіліся палавым шляхам.

Толькі лабараторны тэст на ВІЧ-інфекцыю дазваляе яе выявіць своечасова. Прайсці добраахвотнае тэсціраванне на ВІЧ, у тым ліку ананімнае, можна ў любой лячэбнай установе, якая мае працэдурны кабінет. Своечасова пачаўшы лячэнне антырэтравіруснымі прэпаратамі, ВІЧ-станоўчыя людзі могуць пражыць доўгае і паўнацэннае жыццё, знізіць рызыку перадачы ВІЧ іншым людзям.

У гэтыя дні ў Беларусі ва ўсіх рэгіёнах арганізаваны акцыі, лекцыі і гутаркі, накіраваныя на тое, каб папярэдзіць людзей пра рызыку інфіцыравання і навучыць пазбягаць небяспекі. У     храмах праходзяць памінальныя богаслужэнні.

Мэта інфармацыйнай кампаніі – усведамленне неабходнасці выбару чалавекам, асабліва моладдзю, правільнай і бяспечнай мадэлі паводзін, дамінавання каштоўнасцяў сям’і.