Служы, як я служыў, сынок
Вясной і восенню штогод становяцца ў строй навабранцы. У гэтыя майскія дні рады Узброеных Сіл Рэспублікі Беларусь папоўняць 42 юнакі з Ляхавіччыны.Шасцёра нашых землякоў тыдзень назад адправіліся служыць у 38 асобную дэсантна-штурмавую брыгаду ў Брэсце. Акрамя таго, у армейскай геаграфіі – сухапутныя войскі, войскі супрацьпаветранай абароны, пагранічныя і ўнутраныя. Месцы тэрміновай службы не абмяжоўваюцца Брэсцкай вобласцю – гэта і Гродна, Слонім, Мінск. Яшчэ два нашыя землякі будуць служыць у рэзерве.
– З кожным новым прызывам пераконваемся, што навабранцы ідуць у армію матывавана, фізічна і маральна падрыхтаваныя. Улічваецца іх жаданне служыць у тым ці іншым родзе войскаў. Вызначальным у канчатковым рашэнні становяцца стан здароўя, маральна-псіхалагічныя якасці, – адзначае начальнік адасобленай групы Ляхавіцкага раёна ваеннага камісарыята Аляксандр Байчык.
Сярод сёлетніх прызыўнікоў шасцёра з вышэйшай адукацыяй. Для іх служба будзе доўжыцца год, для астатніх – на паўгода больш. Зараз навабранцы праходзяць курс маладога байца, а 10 чэрвеня прымуць прысягу.
У якіх кутках Беларусі ні знаходзіліся б нашы салдацікі, яны ведаюць – дома іх вельмі чакаюць родныя і блізкія. Усе юнакі атрымалі наказ выконваць канстутыцыйны абавязак дастойна і добрасумленна, прадоўжыць эстафету вайсковых традыцый, каб калісьці з гонарам сказаць: “Служы, як я служыў, сынок!”.
Наталля ПЕРАПЕЧКА.
