Зямлі куратары. 4 чэрвеня меліяратары адзначаць прафесійнае свята

Але асушэнне-арашэнне ўсяго толькі класіка вытворчага меліярацыйнага жанру. Сёння, каб жыць, а не перабівацца, не таптацца на месцы, а расці ў аб’ёмах падрадных работ і сумах атрыманай выручкі,  меліяратары вымушаны круціцца. Дыверсіфікаваць і віды работ, якія гатовы выконваць, і іх геаграфію.

Капыльская  раёнка не пашкадавала плошчы і хвалебных слоў у адрас ляхавіцкіх паляпшальнікаў тамтэйшай зямлі. Нашы людзі, тэхніка ў складзе пары экскаватараў, бульдозера, іншага “жалеза” працягваюць выконваць комплекс работ па добраўпарадкаванні населеных пунктаў Капыльшчыны. У прыватнасці, вядомай сваім дачыненнем да роду Вайніловічаў, вёскі Савічы. Паказалі сябе рупліўцамі, надзейнымі работнікамі, спецыялістамі сваёй справы.

Падобны вопыт Ляхавіцкае ПМС мела і на Случчыне. Работы там завершаны, што зусім не азначае канчатковы “разрыў кантакта” паміж дзелавымі партнёрамі. Дырэктар прадпрыемства меліярацыйных сістэм Сяргей Баргамон хоць і з асцярожнасцю, але гаворыць пра магчымае на слуцкую зямлю вяртанне. Як і ў суседні Баранавіцкі раён, дзе нашы меліяратары паказалі сябе ўмелымі рэкультыватарамі выпрацаваных кар’ераў.

Узімку, калі зямля знаходзіцца ў сонным адпачынку і патрабуе ад чалавека ўсё меншай увагі, нагрузка на арганізацыі меліярацыйнага профілю адчувальна змяншаецца. Адкрываюцца “вокны” ў рабочым і вытворчым графіках, з’яўляюцца “лішнія” экзэмпляры тэхнікі. Па меншай меры неардынарным здаецца спосаб, выбраны ляхавіцкімі пээмэснікамі з мэтай закрыць гэтыя самыя “вокны”. Працавалі ў адной з аграструктур Клецкага раёна. На далёка не профільных для сябе работах па вывазцы на сельскагаспадарчыя палеткі арганічных угнаенняў.

Будучы ўладальнікам даволі магутнага і разнастайнага па калібры і прызначэнні каравана аўтамабільнай і трактарнай тэхнікі, ПМС не дазваляе яму прастойваць. Узнікла неабходнасць у пагрузцы-разгрузцы, перамяшчэнні груза? Карысным для вас будзе адрас у горадзе Ляхавічы: вуліца Працоўная, 13.

Яшчэ Ляхавіцкае ПМС атэставана і мае вопыт укладкі тратуарнай пліткі, выканання падрадаў па  пракладцы інжынерных сетак, у тым ліку падземных – водаправодных, каналізацыйных, іншае.

Рэанімавалі лесапільную ўстаноўку. Пасля доўгага прастойвання піларама вярнула сабе функцыі дапаможнага вытворчага актыву. “Распусціць” лес-кругляк на дошку, выпілаваць брус для гаспадарчых патрэб стала куды больш простай, хуткай і менш затратнай справай, чым калі б давялося звяртацца за дапамогай да іншых. Цяпер ужо іншыя звяртаюцца ў ПМС з заказамі: распусціць, выпілаваць, абрэзаць.

У нашу размову з кіраўніком прадпрыемства “ўмешваліся” частыя тэлефонныя званкі. Адзін з абанентаў, як растлумачыў Сяргей Уладзіміравіч, звярнуўся за дапамогай у абнаўленні штучнага вадаёма: сажалка “заплыла” водарасцямі, ілам. Маўляў, ці можаце і што па чым? Канешне ж, могуць і не толькі ўбраць-пачысціць – па жаданні і наяўнасці ў кліента неабходных дазволаў уладкуюць вадаём з нуля.

На параўнальна вузкім адрэзку часу касьба, абкошванне, падкошванне травы з’яўляецца шырока запатрабаваным сэрвісам прадпрыемства меліярацыйных сістэм.  Быць роўна “падстрыжанымі”, выглядаць акуратна дагледжанымі павінны ўсе меліярацыйныя каналы і канальчыкі, масты і пераезды, тэрыторыі помпавых станцый і многіх-многіх балансавых аб’ектаў ПМС. З рашэннем гэтай задачы павінна справіцца адмыслова створанае “зялёнае” звяно. Квартэт навясных дыскавых касілак у агрэгацыі з МТЗ адсочвае і “рэгулюе” травастой у перыметры раённай  асушальнай сістэмы. Яшчэ адзін такі агрэгат працуе ў рэжыме вольнага касца. Выязджае на заказы жыхароў горада і раёна, па запрашэннях вытворчых і пазавытворчых арганізацый. Усіх, хто мае патрэбу ў якасных паслугах за ўмераную аплату.

За 4 месяцы года амаль 30 працэнтаў выручаных грошай Ляхавіцкае ПМС атрымала на пазабюджэтных работах. І гэта лепшы адносны паказчык сярод 14 падобных прадпрыемстваў вобласці.

Але гэты, свайго роду, пабочны прадукт – дадатковая крыніца заробку. На першым месцы – меліярацыя: абслугоўванне, тэхнічны догляд, рамонт, аднаўленне, рэканструкцыя сістэм асушэння. Напрыклад, з завяршэннем рамонту меліярацыйнай сістэмы “Востраў”, які зараз актыўна вядзецца, у гаспадарчы абарот будзе “дабаўлена” 200 гектараў зямлі. Працуюць на сваятыцкіх (ААТ Жарабковічы”) землях, з мінулага года доўжыцца рэканструкцыя меліярацыйнай сістэмы “Ліпнянка”, некаторае іншае.