“Мы будзем разам”
Яркі вобраз, энергія праз край, усмешка шчыра-сонечная, голас прыгожа-моцны – на сцэне зорка беларускай эстрады Аляксандр Саладуха. Кожнае яго выступленне – музычна-маштабнае шоу, кожная песня – непаўторна-цудоўная гісторыя. 14 чэрвеня ў гарадскім Доме культуры Аляксандр будзе спяваць для ляхавічан. У новай канцэртнай праграме “Мы будзем разам” артыст прэзентуе 11-ы па ліку сольны альбом. Новыя песні, новая аранжыроўка, але па-ранейшаму вочы ў вочы з кожным гледачом у зале, калі адчуваеш, што спяваюць для цябе.Стартаваў вялікі гастрольны тур пры аншлагу ў Брэсце 1 лютага. Сёння за плячамі ў Саладухі і яго каманды 2 дзясяткі гарадоў і мноства эмоцый, якімі артысты шчодра дзеляцца на сваіх канцэртах.
“ЛВ” пацікавіўся творчымі планамі спевака.
– Аляксандр, з якім настроем прыязджаеце ў Ляхавічы і чым будзеце здзіўляць?
– У Ляхавічы заўсёды адпраўляюся з радасцю і задавальненнем. З горадам звязаны самыя прыемныя ўспаміны і нават некаторыя старонкі біяграфіі. Менавіта ў мясцовую санстанцыю загадчыкам санітарнага аддзела 35 гадоў назад я быў размеркаваны пасля заканчэння Мінскага медінстытута. Але не даехаў – пераразмеркаваўся і накіраваўся ў сталіцу.
Для мяне не мае значэння, дзе выступаць: у Мінск-арэне ці ў раённым Доме культуры. Працую з поўнай аддачай усюды – толькі так можна заваяваць гледача, заслужыць яго давер. У глыбінцы народ асабліва тонка адчувае, дзе фальш, а дзе шчырасць.
“Мы будзем разам” – чацвёрты вялікі тур па Беларусі, 982 канцэрты за 30 гадоў творчай дзейнасці. А яшчэ чвэрць стагоддзя назад нарадзіўся шлягер “Здравствуй, чужая милая”. Дзве гэтыя важныя для мяне даты сталі падставай для тура і запісу новай пласцінкі. На канцэрце будуць гучаць як вядомыя хіты, так і кампазіцыі з новага альбома “Мы будзем разам”, што запісваўся ў Маскве. На сцэне з новымі песнямі і мае сыны Антон і Саша – група “Элемент”.
– Спявак Аляксандр Саладуха плануе загадзя, выбудоўвае траекторыю творчай дзейнасці?
– Як сын ваеннага люблю, каб усё было на сваіх месцах, у парадку, аналізую, падводжу вынікі. На календары 2017 год, а я ўжо складаю творчыя планы на 2019. Там будзе таксама маштабны тур з назвай – “Аляксандр Саладуха – 6:0”, а ў 12-ы альбом увойдуць лепшыя песні з майго рэпертуара – на рускай і беларускай мовах.
– Артыст і ўрач – ці спалучаюцца гэтыя два амплуа?
– Канешне, я верны клятве Гіпакрата, са сцэны песнямі лячу душы людзей.
– На старонцы ў сацыяльнай сетцы вы шчыра радуецеся поспеху калег па шоу-бізнесу, рэпосціце іх выступленні…
– Трэба гаварыць добрыя словы, хваліць, калі бачыш, што ў чалавека штосьці добра атрымліваецца. Закон жыцця: чым больш аддаеш, тым больш атрымліваеш. Было вельмі прыемна, калі фанаты ўзнагародзілі мяне статуэткай “Потому что лучший”. Такія падзеі натхняюць, надаюць сілы.
– Апора ў жыцці Аляксандра Саладухі – гэта хто?
– Як бы гэта ні гучала пафасна – гэта Радзіма, родныя мясціны, беларуская зямля, мая жонка Наталля, дзеці, унукі. Канешне, мая каманда, калектыў, з якім працуем, развіваемся. Сям’я і дзеці падтрымліваюць мяне ва ўсіх пачынаннях. Дачка Варвара сёлета пойдзе ў 1 клас, 2 гады займаецца вакалам і харэаграфіяй і ўжо мае дыпломы і ўзнагароды. Спадзяюся, што з цягам часу на афішы будзе пазначана: “Аляксандр Саладуха, сыны і Варвара”.
Мая любоў – мае гледачы, якім я шчыра ўдзячны за шматгадовую ўвагу і інтарэс да маёй творчасці. Усіх вас, ляхавічане, буду рады бачыць на канцэрце. Спадзяюся, што праграмма “Мы будзем разам” не расчаруе нікога. Заўсёды ваш, Аляксандр Саладуха.
Гутарыла Наталля ПЕРАПЕЧКА.
