Добры доктар педыятр

Вопытны ўчастковы ўрач-педыятр Алена Саланенка  ўважліва аглядае малышку і  супакойвае жанчыну:

– Не хвалюйцеся.  Гэта першыя зубкі прарэзваюцца. Так бывае.

Алена Саланенка, як і яе калегі  Святлана Ціпко, Генадзій Сокал, чатыры дзесяцігоддзі  ў педыятрыі.  Лечаць ужо  дзяцей  і  нават унукаў сваіх першых пацыентаў. Іх вопыт пераймае маладая калега, актывістка грамадскага жыцця райбальніцы Вольга  Грыцкевіч.

– У сярэднім за дзень у дзіцячай кансультацыі на лячэбным і прафілактычным прыёме бывае каля сотні хлопчыкаў і дзяўчынак ва ўзросце  ад  нараджэння да 18 гадоў. І да кожнага імкнёмся знайсці індывідуальны падыход, каб нават самыя маленькія пацыенты не баяліся белага халата, – расказвае  галоўны педыятр раёна  Інэса Драздовіч.  Інэса Канстанцінаўна не нарадуецца  на выдатныя ўмовы, створаныя  ў дзіцячай кансультацыі пасля капрамонту паліклінікі:

– У нас цяпер цэлае крыло  са сваёй рэгістратурай, у кожнага ўрача – уласны кабінет.  На прышчэпку, для прафілактычнага агляду – адны памяшканні, для хворых дзяцей – другія.  Камфортна.  А колькі новых даследаванняў можна правесці ў райбальніцы. Яшчэ некалькі гадоў назад для УЗІ сэрца, галаўнога мозга накіроўвалі  пацыентаў у Баранавічы, Брэст. Цяпер гэта робяць на  добрым абсталяванні  не менш прафесіянальныя ляхавіцкія  ўрачы.

Педыятры выязджаюць па выкліках да хворых  на дом, кансультуюць вясковых медыкаў.  Іх памочнікі – медыцынскія сёстры, якіх у дзіцячай кансультацыі працуе сямёра. Сярод іх вопытныя  Вольга Шытава і Наталля Аляшкевіч.

– Калі б зноў стала пытанне, якую ўрачэбную спецыялізацыю выбраць, іншых варыянтаў, чым педыятрыя, адназначна не было б, – сцвярджае педыятр з 22-гадовым стажам Інэса Драздовіч.

Педыятрычным аддзяленнем  райбальніцы загадвае  Марына Вармахоўская.  Нашы  землякі давяраюць  ёй і яе калегам самае дарагое – здароўе сваіх сыночкаў і дачушак.  Ці трэба гаварыць, што, акрамя прафесіяналізму, яны аддаюць дзецям  часцінку сваёй душы, цеплыню і чуласць.

– У нашым аддзяленні пануюць  сардэчнасць і спагада, шчырае жаданне дапамагчы, – гаворыць Марына Антонаўна.

З  павагай  яна расказвае пра медыцынскіх сясцёр Ларысу Чараднічэнка, Люцыну Ходар, Наталлю Сяргей, Алену Савасцьянік, старшую медсястру Святлану Татарыновіч. Добра спраўляецца са сваімі абавязкамі малодшы медыцынскі персанал: Людміла Курловіч, Наталля Люкіш, Святлана Шклянік, Ніна Собаль, сястра-гаспадыня Ірына Дудук, раздатчыца Вера Дарэўская.

У рабоце для ўсіх нас самае галоўнае – здароўе маленькіх пацыентаў.  І як ні ўсміхнуцца на пачутае ад  трохгадовага  Кірыла:

– Калі вырасту, буду доктарам, як цёця Марына.