Кампазіцыі кампазітнай
Аляксей Клявец рыхтуе да адпраўкі чарговую партыю тавару.
Лепшы раён для бізнесу Беларусі-2016” – такога звання Ляхавіцкі раён удастоены як пераможца рэспубліканскага конкурсу сярод гарадоў ці раёнаў з колькасцю насельніцтва менш за 50 тысяч чалавек. І гэта не адзіная леташняя перамога з ляхавіцкім адрасам у сферы бізнесу і прадпрымальніцтва.
Таварыства з абмежаванай адказнасцю “Кампазітная кампанія” заснавалі Аляксей Клявец (цяперашні дырэктар), Віктар Яфімік і Юрый Піваш, якія вырашылі заняцца вытворчасцю вырабаў з палімерных матэрыялаў, што выпускаюцца ліццём пад ціскам. І не прагадалі з гэтым імпартазамяшчальным праектам. Па выніках мінулага года ў нацыянальным конкурсе “Прадпрымальнік года” пераможцам у намінацыі “Паспяховы старт” стала менавіта “Кампазітная кампанія” з Ляхавіч.
Мэблевая фурнітура, крапежныя дэталі, поліэтыленавыя накрыўкі, тэхнічныя камплектуючыя для радыятараў – не адзін дзясятак найменняў прадукцыі выпускае таварыства. Пачынаючы з мінулага года сваю “кампазітную” прадукцыю пастаўляюць не толькі па беларускіх адрасах, але і па расійскіх.
– Будзем асвойваць новыя рынкі збыту, рэалізоўваць новыя вытворчасці. У развіццё ўкладваем уласныя сродкі, карыстаемся і крэдытамі, – расказвае Аляксей Клявец. Пакуль у “Кампазітнай кампаніі” працуе 11 чалавек, але з пашырэннем вытворчасці будуць створаны новыя рабочыя месцы.
На Ляхавіччыне дзейнічае 135 прадпрыемстваў прыватнай формы ўласнасці, дзе працуе 15 працэнтаў занятага ў эканоміцы раёна насельніцтва. У мінулым годзе створана 6 новых прадпрыемстваў малога бізнесу, а гэта больш за 150 дадатковых рабочых месцаў. І ўжо сёлета ў палку прадпрымальніцтва папаўненне: пачалі працаваць яшчэ 2 прадпрыемствы.
Галіна КАНЬКО.
