Як рамяство ператварыць у самазанятасць. У Куршынавічах Ляхавіцкага раёна пры падтрымцы ЕС-ПРААН адкрыўся рэсурсны цэнтр развіцця творчасці і рамёстваў
Жадаеце навучыцца маляваць на спілах дрэў, ткаць на станку, авалодаць тэхнікай ласкутнага шыцця ці іншым майстэрствам? Тады вам у Куршынавічы ў міжнародны Дом мастацтваў! На яго базе 7 ліпеня ўрачыста адкрыўся рэсурсны цэнтр развіцця творчасці і рамёстваў, створаны ў рамках праекта «Садзеянічанне развіццю на мясцовым узроўні ў Рэспубліцы Беларусь», які фінансуецца Еўрасаюзам і рэалізуецца ПРААН. Частковае фінансаванне ад Еўрасаюза распрацоўкі «Падтрымка дзелавой ініцыятывы насельніцтва на аснове развіцця народнай творчасці і адраджэння рамёстваў» (так назваў свой праект, які перамог у конкурсе мясцовых ініцыятыў, дырэктар міжнароднага Дома мастацтваў Валерый Ясевіч) склала 26,5 тысячы еўра.
Культурная падзея сабрала мясцовых жыхароў і шматлікіх гасцей не толькі з нашага раёна. Сярод ганаровых гасцей – каардынатар праектаў прадстаўніцтва Еўрапейскага саюза ў Беларусі Наталля Стасевіч, каардынатар праектаў ПРААН Вольга Атрошчанка і каардынатар конкурсаў мясцовых ініцыятыў Наталля Адамчык. Яны падкрэслілі, што ў партнёрстве з ЕС ПРААН рэалізуе больш за 250 ініцыятыў, накіраваных на падтрымку аховы здароўя, экалогіі, культуры і г.д. у мэтах рэгіянальнага развіцця. Адна з іх мае куршынавіцкі адрас. Яе працяг і далейшы лёс залежаць ад зацікаўленых, тых, для каго яна прыдумвалася.
Прысутных з адкрыццём творчай установы павіншавала намеснік старшыні райвыканкама Дзіяна Трысцень.
Ліліся песні, шмат слоў сказана пра значнасць аб’екта для арганізацыі занятасці насельніцтва і праяўлення бізнэс- ініцыятывы, распаўсюджвання перспектыўнага вопыту ў сферы дадатковай адукацыі дзяцей і дарослых. І вось чырвоная стужка перарэзана! Усе паспяшаліся ўбачыць выставу творчасці народных умельцаў і майстар-клас. Валерый Ясевіч з натхненнем гаварыў пра далейшыя планы ўстановы. Тут кожны жадаючы зможа бясплатна авалодаць навыкамі ці ўдасканаліць уменні па розных напрамках і відах рамёстваў і творчасці. Прыезджым ёсць дзе спыніцца, прадугледжаны тут і дзіцячы пакой, у якім знойдзецца занятак малышам.
Валерыю Ясевічу ўдалося для ўвасаблення ініцыятывы запрасіць цікавых і яркіх настаўнікаў, сапраўдных майстроў сваёй справы. У руках сталічнага рамесніка Наталлі Гамаюнавай звычайны ліст паперы на вачах ператвараецца ў мастацкі твор. Пра выцінанку, якой яна займаецца 17 гадоў, расказвае з захапленнем на мілагучнай роднай мове. Работы мастачкі вытанчаныя, бы карункавыя.
Валянціна Пазднякова і выхаванцы аб’яднання па інтарэсах «Добры настрой» з СШ № 3 г. Мінска ў Куршынавічах не першы раз. Ім ёсць што паказаць і расказаць пра сваё захапленне саломапляценнем і выцінанкай. Іх сувеніры і вырабы прыгожыя і душэўныя, цёплыя і вельмі свае, народныя. Адна стараславянская азбука чаго вартая! Дарэчы, у сталічным Палацы моладзі праходзіць персанальная выстава работ гурткоўцаў.
Вырабы Галіны Логінавай са Светлагорска прыцягваюць арыгінальнасцю і шматграннасцю. Тут і лялькі з ільну, і ружы з тканіны, і пчолкі з бісеру, і многае іншае. Надзвычай творчы чалавек, стварае і рукамі, і душой, піша вершы. Цыкл яе малюнкаў «Кветкі сусвету» выклікае жаданне спыніцца, падумаць, памарыць.
Ніна Казак прыехала з Хатынічаў. 17 гадоў адпрацавала ў тамтэйшым Доме рамёстваў. Зараз на пенсіі – у свабодным плаванні. Удзельнічае ў творчых выставах па ўсёй Беларусі. Гэта пра яе : «…і тчэ, забыўшыся, рука». Назіраць, як спраўна чаўнок пракладвае сцяжынку і нараджаецца дзіўнай прыгажосці пояс, рушнік ці іншае рукадзелле – адно задавальненне. Дарэчы, ад Ніны Мікалаеўны прысутныя даведаліся, што ходнікамі (ад слова хадзіць) называюць на Ганцаўшчыне палавікі.
Вернісаж педагога з Клецкай школы мастацтваў Таццяны Матусевіч прыцягвае нейкім асаблівым святлом. Мастачка расказвае, што любіць маляваць партрэты. У рэсурсным цэнтры будзе выкладаць азы малявання на спілах дрэў.
Усе гэтыя і іншыя майстры гатовы перадаваць сакрэты сваёй справы ў вучэбна-творчых майстэрнях Куршынавіцкага Дома мастацтваў, у якія, дарэчы, дзякуючы Еўрасаюзнаму фінансаванню, закуплена сучаснае інтэрактыўнае абсталяванне.
Свае работы прэзентавалі і нашы землякі. Мастак малюе фарбамі, а Ніна Ярошка – ніткамі. Яе вышыванымі карцінамі захапляюцца ляхавічане падчас фестывалю «З крыніц спрадвечных», на разнастайных выставах. Праваслаўныя сюжэты, пейзажы – любімыя яе тэмы. І для экспазіцыі «Куршынавіцкая хата», дзе частавалі стравамі беларускай кухні, менавіта Ніна Іванаўна прапанавала рэчы хатняга ўжытку. Прысутныя паласаваліся тут бабкай. Ніна Іванаўна дэманструе драўляную маслабойку, паказвае паўкілю – форму, куды залівалі масла, цюфяк з сена – сяннік, якому больш за восем дзясяткаў гадоў. Тут жа і іншыя прыстасаванні, якія зараз сустрэнеш, пэўна, толькі ў музеі.
Натхненне і замілаванне выклікаюць вырабы творчай сямейнай дынастыі – маці і дачок Івановых.
Лідзія Курловіч са школы народнай творчасці пры Свяціцкім СДК, таксама прэзентуе вышыўкі. Узоры крыжыкам, гладдзю на адзенні, невялікія падушкі-«думачкі» – чаго тут толькі няма. Гаворыць, што вельмі любіць упрыгожваць адзенне народнымі ўзорамі і дадае, што ў Доме культуры дзейнічае клуб аматараў вышыванкі, дзе майстрыхі ствараюць сапраўдныя шэдэўры.
З першага позірку пакарыў фальклорны ансамбль «Бяседушка» з пасёлка Архангельскае Маскоўскай вобласці. Яго спевы прыемна слухаць, а па самабытных касцюмах можна вывучаць моду XIX стагоддзя. Кіраўнік «Бяседушкі» Вольга Гладкіх гатова бясконца гаварыць пра калектыў, рэпертуар і пра тое, як ім спадабалася ў Куршынавічах.
Першы дзень работы рэсурснага цэнтра завяршыўся вялікім канцэртам, у якім прынялі ўдзел калектывы з Ганцавіч, Клецка і іншых месцаў. А назаўтра свята з яшчэ большым размахам запрашала, гаманіла і спявала. Працягваліся майстар-класы, выставы, можна было атрымаць кансультацыі ў спецыялістаў наконт працаўладкавання, высветліць нюансы адкрыцця ўласнай справы і г.д.
Лета. Сонца. Самы час адправіцца ў рэсурсны цэнтр развіцця творчасці і рамёстваў у Куршынавічы. Тут вас чакаюць.
Наталля ПЕРАПЕЧКА.
Фота аўтара.
Каардынатары праекта Наталля Стасевіч, Наталля Адамчык, Вольга Атрошчанка.
Наталля Стасевіч перадае Валерыю Ясевічу падарункі ад ЕС-ПРААН для дзіцячага пакоя рэсурснага цэнтра.
Свяцічанка Лідзія Курловіч.
Ніна Казак – вопытная ткачыха з Хатынічаў.
«Спусціўшы рукавы» – так называецца ўбор, у які апранута кіраўнік «Бяседушак» Вольга Гладкіх.
