Яблык з апельсінавым смакам. Ляхавіцкі кансервавы завод зноў уладальнік «Крыштальнага яблыка»
У спартсменаў залаты медаль Алімпіяды, у журналістаў «Залатая Ліцера», у тэлевізіёншчыкаў «Тэлевяршыня». А якасць работы кансерваўшчыкаў ацэньваецца «Крыштальным яблыкам». Рэспубліканскі конкурс, за перамогу ў якім уручаецца дыплом і «яблычны» прыз, праводзіцца навукова-практычным цэнтрам па харчаванні Нацыянальнай акадэміі навук Беларусі сярод кансервавых заводаў краіны. Другі год запар сярод лідараў гучыць ляхавіцкі адрас. У мінулым годзе ўзнагароду прадпрыемству прынёс сок ананасавы адноўлены для дзіцячага харчавання. А сёлета на X юбілейнай цырымоніі, якая днямі прайшла ў Бабруйску, у фаварытах аказаўся сок апельсінавы адноўлены. Ён прызнаны самым смачным у намінацыі «Сокі, нектары, морсы для дзіцячага харчавання». Каб стаць прадуктам №1, соку давялося вытрымаць экзамен перад дэгустацыйнай камісіяй, у склад якой увайшлі прадстаўнікі шэрага ведамстваў і арганізацый.
– Прыемна быць сярод лепшых. Радасць узмацняецца, калі ўлічыць, што віды на ўзнагароду мелі 46 прэтэндэнтаў. Атрымаць «яблычак» пашчасціла толькі 12. Патрабаванні да кансерваванай прадукцыі, тым больш – прызначанай для дзіцячага харчавання, даволі жорсткія. Перамога накладае і дадатковыя абавязацельствы. Вывучаем попыт, распрацоўваем уласныя рэцэпты саленняў-варэнняў-сокаў, каб было па-дамашняму смачна, – гаворыць дырэктар завода Сафія Болтуць.
Дарэчы, у асартыментнай лінейцы прадпрыемства больш за 100 найменняў кансерваванай прадукцыі: сокі, нектары, соусы, гарніры, першыя абедзенныя стравы, варэнне і многае іншае.
Наталля ПЕРАПЕЧКА.
Фота Сяргея ВАРАНОВІЧА.