Чарніцы на вагу… персікаў. Што, дзе, па чым: прапанова садавіны-агародніны ляхавічанам

Кацярыне Пятроўне 73 гады,  яна  па-ранейшаму  без справы сваё  жыццё не ўяўляе. Як толькі спеюць ягады  –  за вядро і ў лес – калі адна, калі з дзецьмі, унукамі.  Сабранае ідзе на пачастункі,  варэнне-кампоты, замарозку.
– Ягадныя мясціны ведаю  з дзяцінства – сама тутэйшая. Калі год ураджайны, як леташні, то вёдраў 15 чарніц  збіраем. Усе не перапрацаваць. Таму прадаю на рынку: да пенсіі някепская прыбаўка. Сёлета ягада  дробная і мала яе.  Прадаю  слоікамі, па 4-5 рублёў за літр, – расказвае адна з гандлярак на рынку.
Сапраўды, леташні  садавінна-агароднінны гандаль  яўна праходзіў з большым размахам, чым сёлетні. Гэта стала зразумелым яшчэ  з пачаткам сезона клубніц.
За таварам, які прадаецца на рынку, арганізаваны санітарны кантроль. Для продажу дароў саду, агарода, лесу, неабходна атрымаць у лабараторыі санветэкспертызы даведку, што прадукцыя не ўтрымлівае шкодных рэчываў. Як зазначыла  ветурач-санэксперт Ганна Дзяцел, ягады, агародніна, садавіна такую праверку праходзяць паспяхова.  Напрыканцы мінулага тыдня на ляхавіцкім рынку садавінай і агароднінай з падсобных гаспадарак  гандлявалі толькі  7 чалавек: мясцовыя і з Пінскага раёна.
Ягадны сезон завяршаецца хутка, а дароў лета хочацца і зімой, і вясной. Той, хто паспее замарозіць ці насушыць ягад, адчувае сябе ў выйгрышы:  даставай, размарожвай, вары кісялі і кампоты. Менш запаслівыя спяшаюцца ў крамы: цяпер там «замарозкі»  хапае. Канкурэнцыю імпартнай прапанове складае беларуская  прадукцыя:  колькасць цэхаў глыбокай замарозкі ў нашай краіне павялічваецца. У Ляхавіцкім кааппраме ўсё халадзільнае абсталяванне прайшло неабходную паверку і гатова да прыёму сезоннага асартыменту. Праўда, чарніц пакуль не замарозілі ні грама… Нарыхтавалі  250 кілаграмаў.
Пра якасць нарыхтовак   дбае і ўласная лабараторыя райпо: правяраецца кожная партыя  садавіны-агародніны і дароў лесу. Праўда, узнікае пытанне: чаму такія засмечаныя лісцем чарніцы, што прадаюцца ў райпоўскай палатцы на рынку? Куды глядзелі нарыхтоўшчыкі, калі прымалі такую ягаду – хутчэй за ўсё, сабраную недазволенымі прыладамі? Чаму супрацоўнікі райінспекцыі прыродных рэсурсаў і аховы навакольнага асяроддзя не зацікавяцца гэтай акалічнасцю?
Спрадвеку фаварытам ліпеньскага стала беларусаў была  маладая бульба. Сёння набыць яе можна і на рынку, і ў магазінах. Кошт –    70-80 капеек за кілаграм. А калі на сваіх сотках вырасцілі неблагі ўраджай, то лішкі можна прадаць нарыхтоўшчыкам райпо. Цяпер – па 50 капеек за кілаграм. Ранняя  бульба,  закупленая ў насельніцтва і ў райаграсэрвісе, адпраўляецца ў магазіны райспажыўкааперацыі, астатняя – прадпрыемствам грамадскага харчавання нашага і суседняга раёнаў, а яшчэ ў летнік «Чайка», сталовыя райбальніцы і аблпсіхбальніцы.
У чэрвені  ў райпо  пачаўся і агурочны сезон. Тады нарыхтоўвалі ў асноўным у Столінскім раёне, цяпер прывозяць і з Івацэвіцкага. Пакуль за кілаграм плацяць ад 70 да 90 капеек у залежнасці ад кандыцыі. З закупленых 320 тон агуркоў  205  тон прададзена  мясцоваму кансерваваму заводу. Дарэчы, нарыхтоўчая дзейнасць нашага перапрацоўчага прадпрыемства чамусьці стала абмяжоўвацца закупам. А работа з пасрэднікамі заўсёды больш дарагі варыянт…
У актыве райпоўскіх  нарых-тоўшчыкаў – 11 тон чырвоных  буракоў, 55 тон капусты.  Пакуль.
У райпо разумеюць, што многае залежыць, у першую чаргу,  ад работы нарыхтоўшчыкаў (у спажыўкааперацыі раё-на 3 такія спецыялісты). Аналагічныя  функцыі выконваюць і 4 нарыхтоўчыя пункты ў горадзе. Прымаюць садавіну, агародніну, грыбы, ягады і ў   9 сельскіх магазінах. А можна заказаць кааппрамаўскую машыну прама на дом.
Планаў жа на гэту прадукцыю ў райпо нямала. Частка  яе застанецца для патрэб прадпрыемстваў  сістэмы: замарожваецца, засольваецца, квасіцца  і потым адпраўляецца ў продаж,  на прадпрыемствы грамадскага харчавання,  на захоўванне. А, напрыклад, бульбу плануецца адпраўляць і на экспарт у Расію.
…Днямі прыемна ўразіў дапоўнены асартымент сезоннай прадукцыі ў райпоўскім павільёне на рыначнай плошчы: у продажы з’явіліся нават буякі садовыя, квяцістая капуста, лісічкі лясныя. Па вельмі прымальнай цане.
Галіна КАНЬКО.
Фота Сяргея ВАРАНОВІЧА.

Добавить комментарий

Ваш e-mail не будет опубликован. Обязательные поля помечены *