Зялёнае святло навасельцаў у Ляхавічах
Яшчэ нядаўна тут шчыравалі будаўнікі, а цяпер камісіі адна за другой правяраюць ступень гатоўнасці, каб нарэшце вынесці канчатковы вердыкт: прынята! На гэтым тыдні аб’ектам павышанай увагі правяраючых стаў рэканструяваны будынак па адрасе вуліца Леніна, 54 у райцэнтры. Тут па суседстве размесцяцца 35 кватэр і аддзяленне дзённага знаходжання для грамадзян пажылога ўзросту тэрытарыяльнага цэнтра сацыяльнага абслугоўвання насельніцтва.
Пакуль яшчэ невядомыя шчаслівыя арандатары 14 аднапакаёвых, столькіх жа двухпакаёвых і 7 трохпакаёвых кватэр, аднак патэнцыяльным навасельцам можна па-добраму пазайздросціць. Будаўнікі (рэканструкцыяй былога каледжскага інтэрната займалася ПМК-13) зрабілі ў памяшканнях сучасны рамонт. Столь навясная, на падлозе – ламінат, сцены паклеены дабротнымі шпалерамі, устаноўлены новая сантэхніка і газавыя пліты, вокны пластыкавыя. Абноўлены і інжынерныя сістэмы – вода-, электра-, газа -, цеплазабеспячэння. Атрымлівай ключы ад кватэры, завозь мэблю па сваім гусце – і жыві на здароўе. Кватэры будуць прадастаўляцца ў арэнду тым, хто мае патрэбу ў паляпшэнні жыллёвых умоў, а таксама маладым спецыялістам, якія прыехалі на Ляхавіччыну па размеркаванні.
На першым паверсе аднаго з двух пад’ездаў створаны выдатныя ўмовы для адпачынку, работы разнастайных гурткоў па інтарэсах для людзей сталага ўзросту.
Добраўпарадкавана і тэрыторыя вакол шматпавярховіка.
Увогуле, арэндны дом абышоўся абласному бюджэту ў 1800 тысяч рублёў, а сацыяльны аб’ект раённаму бюджэту – у 250 тысяч рублёў.
Галіна ЗАРЭЧНАЯ.
Фота Сяргея ВАРАНОВІЧА.