І павіншавалі, і праверылі
У такую гарачую пару, як жніво, прафсаюзы побач з аграрыямі. Здаецца, зусім нядаўна ўшаноўвалі першага вадзіцеля-тысячніка Аляксандра Азарчыка з “БелДана”. Падзея сапраўды прыемная і запамінальная: прама ў полі перадавік атрымаў падарункі ад раённай улады, райкама БРСМ, пісьмо падзякі ад райкама прафсаюза, сувеніры. Шмат цёплых слоў віншавання не толькі ад галіновага, але і раённага аб’яднання прафсаюзаў, тутэйшай прафсаюзнай пярвічкі было адрасавана і першым тысячнікам па намалоце збожжа – экіпажу ААТ “Жарабковічы” ў складзе старшага камбайнера Андрэя Дзянішчыка і камбайнера Паўла Булатага. Не засталіся без увагі і іншыя ўдзельнікі жніва.
Яшчэ задоўга да ўборачнай у кожным сельгаспрадпрыемстве прафсаюзы разам з наймальнікамі распрацавалі ўмовы спаборніцтва, дзе ў абавязковым парадку прадугледжваліся маральнае і матэрыяльнае стымуляванне за паспяховую работу. На так званых экранах паспяховасці ў кожным прадпрыемстве штодзённа размяшчаецца інфармацыя: хто і колькі намалаціў-перавёз-перапрацаваў.
У зоне асаблівай увагі прафсаюзаў тэхніка бяспекі. Грамадскія інспектары кантралююць выкананне правілаў і нормаў аховы працы, праводзяць інструктажы, сочаць, каб камбайны і аўтамабілі былі абсталяваны сродкамі індывідуальнай аховы. Пільная ўвага надаецца арганізацыі гарачага харчавання ў полі. Хочацца адзначыць, што паўсюдна паклапаціліся пра гэту важкую акалічнасць: усе ўдзельнікі жніва атрымліваюць абеды і падвячоркі. Паўсюдна вырашана і гігіенічнае пытанне: у гаспадарках ёсць душавыя, каб механізатары пасля напружанага рабочага дня змаглі памыцца. Не застаюцца па-за ўвагай пытанні забеспячэння спецадзеннем.
Маніторынг – гэта, канешне, важна. Але прафсаюзныя выезды ў поле не абыходзяцца без душэўнай размовы з працаўнікамі. Цікавіліся, як ідзе ўборка, якія праблемы хвалююць яе ўдзельнікаў, ці задавальняе аплата працы і іншымі жніўнымі аспектамі.
Словы ўдзячнасці – прафсаюзным пярвічкам сельгасарганізацый. Малайцы ўсе: незалежна ад фінансавых магчымасцей стараюцца падтрымаць тых, хто заняты на жніве.
Ірына ЧУРА,
старшыня райкама прафсаюза работнікаў АПК.