Натхненне ў метале
Агонь, метал і натхненне – і ў руках ляхавічаніна Віктара Маргаева нараджаецца прыгажосць. Феерверкам разлятаюцца іскры, песняй звініць молат, чырванее распаленае жалеза, пераліваецца і ажывае: майстар з дакладнасцю мастака робіць ці то арыгінальны падсвечнік, ці то вытанчаную жалезную ружу, ці то звычайную падкову…
Кавальскай справай Віктар захапіўся 6 гадоў назад. І цяпер займаецца прафесійна і апантана. Сам вырабіў молат і горан. Яшчэ адно захапленне земляка – рэстаўрацыя тэхнікі. Матацыкл “Днепр” з яго лёгкай рукі стаў чоперам, а стары ЛУАЗ – экстравагантным “гольцвагенам”.
Першую і самую строгую ацэнку кожны твор каваля атрымлівае ад сям’і, як і заўсёдную падтрымку. А сын Арцём стаў надзейным памочнікам у бацькавай справе.
Наталля ПЕРАПЕЧКА.
Фота Сяргея ВАРАНОВІЧА.