Зборная кампазіцыя

Каб падштурхнуць насельніцтва   да карыснай і важнай справы Ляхавіцкая ЖКГ прапануе аплаціць камунальныя паслугі здачай макулатуры, шклабою, пэт-бутэлек ці поліэтылену і іншай другаснай сыравіны. Прымаюць яе  ў прыёмным пункце па вуліцы Чкалава. Калі з’явілася патрэба здаць старую тэхніку, то камунальнікі па тэлефанаванні прыедуць самі. З даведзенага  гадавога задання нарыхтаваць  500 тон паперы і кардону, ЖКГ сабрала менш паловы, на 46 працэнтаў выканала  збор шкла і каля 11 працэнтаў – пластыку.

Кантэйнеры для паасобнага збору  другасных адходаў, якія стаяць па ўсім райцэнтры і не толькі, многія нашыя землякі часта ігнаруюць. А могуць і пакет з бытавым  смеццем побач паставіць ці нават выкінуць яго ў кантэйнер. Між тым,  пры гаспадарскім падыходзе старая тэхніка, пластык  ці папера пераўтвараюцца ў карысныя рэсурсы.

На сартавальнай  лініі, напрыклад, макулатуру прасуюць  і адпраўляюць на  прадпрыемства-перапрацоўшчык, дзе  з яе вырабляюць  кардон, санітарна-гігіенічную паперу і г.д. Не многія ведаюць, што перапрацаваныя пэт-бутэлькі выкарыстоўваюцца ў вытворчасці прэформаў, тэкстылю (штучнай шэрсці), з гэтай сыравіны адліваюць чарапіцу і еўратару. Дабаўляючы ў ПЭТ шкловалакно, атрымліваюць абразіўныя кругі для шліфавання і паліравання. Выходзіць, што бутэлька з-пад напітку на справе не смецце, а стратэгічная сыравіна.

У  райпо  2 перасоўныя пункты па зборы другаснай сыравіны, якія мабільна рэагуюць на запыты насельніцтва і  выязджаюць нават у аддаленыя кропкі раёна.  Самымі актыўнымі здатчыкамі, як правіла, становяцца школы, дзіцячыя садкі, адзначае дырэктар кааппрама Галіна Якубец. Прымаюць макулатуру  і 4 стацыянарныя прыёмныя пункты – на рынку, вуліцах Цітовіча, Савецкай і па завулку Вакзальным. Разлік за яе  на месцы. У сельскай мясцовасці, дзе кожны магазін яшчэ і прыёмны пункт другаснай сыравіны, грошы можна  адразу канвертаваць у прадукты.  Усяго ж з моманту старта месячніка «ўраджай» спажывецкага таварыства склаў  7 тон макулатуры, 500 кілаграмаў  поліэтылену, 5,5 тон шклабою. Уключыліся ў збор макулатуры школьнікі і дашкольнікі:  дзеці  разам з бацькамі нясуць у школу  акуратныя стосікі старых сшыткаў, газет ці кардону.

Шэраг прадпрыемстваў і арганізацый сваё дамашняе заданне па нарыхтоўцы другасных матэрыяльных рэсурсаў – паперы і кардону  – ужо выканалі, хаця ёсць і тыя, каму належыць яшчэ добра папрацаваць. А да збору пластыку, як расказалі  ў аддзеле жыллёва-камунальнай гаспадаркі райвыканкама, прыступілі яшчэ не ўсе. Сярод іх ільнонасенстанцыя, ПМК-17, «БелДан» і ПГУП «ЗападХімГандаль».

З даведзеных раёну для нарыхтоўкі 700 тон макулатуры з пачатку года сабрана толькі  196 тон ці 28 працэнтаў. Да выканання задання неабходна сабраць  яшчэ каля   40 тон  шын  і  больш за

20 тон адходаў бытавой  тэхнікі.   За  апошнія    адказваюць  ЖКГ і райпо. Каэфіцыент карыснага дзеяння райпо ў гэтым пытанні –   нулявы: на 18 верасня з 5 тон яно не нарыхтавала  ні кілаграма. «Ураджай»  камунальнікаў склаў каля 5 тон з неабходных 20.

Фактычна агульнае заданне па нарыхтоўцы другаснай сыравіны, раёнам выканана пакуль на   39 працэнтаў. А да канца года за-стаецца крыху больш за 3 месяцы…