Палявую моду дыктуе каралева. Уборачная перамясцілася на кукурузныя палеткі Ляхавіцкага раёна
На адным полі – уборка другога хлеба, на суседнім кукурузным палетку – зялёнае жніво. Такая карціна не толькі ў СВК «Ляхавіцкі» – на сённяшні дзень лепшым сельгаспрадпрыемстве па ўраджайнасці бульбы і кукурузы, але і ў некаторых іншых.
– Насенне для сяўбы падбіралі вельмі дбайна, улічваючы аптымальныя тэрміны паспявання для нашай мясцовасці, – расказвае галоўны аграном СВК «Ляхавіцкі» Аляксандр Шымкевіч. – Мы выбіраем сярэдняспелыя сарты айчыннай і замежнай селекцыі, бо яны найбольш прыдатныя для нашых земляў.
У гаспадарцы стараюцца дакладна прытрымлівацца тэхналогіі і маюць адпаведны вынік: кукуруза на зялёны корм (пад яе адведзена 290 гектараў) радуе ўраджайнасцю – 474 цэнтнеры на круг. Для параўнання: сярэднераённы паказчык – 258.
Як сведчаць спецыялісты, кукурузны сілас – адзін з самых пажыўных і карысных кармоў для жывёлы. Для яго захоўвання ў «Ляхавіцкім» падрыхтавана спецыяльная траншэя. Закладка сіласу вядзецца ўвесь светлавы дзень пры строгім выкананні тэхналогій. Толькі так сілас захаваецца надоўга і будзе якасным. Яшчэ адна абавязковая ўмова – сухое надвор’е. Пакласці зялёную масу ў вільготныя траншэі – значыць, літаральна знішчыць яе.
Галоўная дзеючая асоба на нарыхтоўцы кукурузы ў СВК механізатар Валерый Ракашэвіч, які па-майстэрску кіруе магутным «Ягуарам». Дарэчы, паралельна з уборкай кукурузы на сваіх палетках «Ляхавіцкі», як і ААТ «Жарабковічы», дапамагае ў гэтай справе «Востраву-Агра».
На мінулым тыдні да нарыхтоўкі культуры на сілас прыступілі ўсе гаспадаркі раёна. Сёлета кукурузны клін Ляхавіччыны – 5537 гектараў, з іх на 4792 гектарах каралева палёў пасеяна на сілас, на астатніх – на зерне.
Ці здольна гэта сельгаскультура істотна змяніць да лепшага сітуацыю з нарыхтоўкай кармоў для зімовага стойлавага перыяду? Пакуль у гаспадарках раёна маецца ў сярэднім па 12 цэнтнераў кармавых адзінак на ўмоўную галаву жывёлы. Бясспрэчны лідар па гэтым паказчыку КСУП «Ліпнянка», дзе ў наяўнасці больш за 30 цэнтнераў на ўмоўную галаву. Прычым, як адзначаюць у райсельгасхарчы, нарыхтаваныя травяністыя кармы належнай якасці. Тым не менш, кукурузу на зялёны корм нарыхтоўваюць і тут.
Галіна КАНЬКО.
Фота Сяргея ВАРАНОВІЧА.