Прапала, што дрэнна ляжала
Апошнім часам на тэрыторыі раёна пачасціліся выпадкі крадзяжоў маёмасці грамадзян. Зладзеяў, якія ўкралі веласіпед у Дарава-Чыж, матацыкл у Тухавічах, водную помпу, 30-метровы шланг і веласіпед у Мядзведзічах, маёмасць з нежылога дома ў Ганчарах, пакуль знайсці не ўдалося. Па ўсіх вышэйпералічаных фактах узбуджаны крымінальныя справы.
З розніцай у некалькі дзён крадзяжы адбыліся ў аграгарадку Падлессе. Спачатку з аднаго падворка ўкралі плуг, потым адразу 2 веласіпеды. У абодвух выпадках сярод зладзеяў – непаўналетнія.
Пакуль гаспадар аднаго з дамоў па вуліцы Мінскай у райцэнтры працаваў у агародзе, аматар чужога дабра ўкраў кашалёк з 80 рублямі з рукзака, які стаяў у двары. Злодзея знайшлі па гарачых слядах, але ён паспеў патраціць грошы на спіртное. На выпіўку пайшлі і сродкі, атрыманыя за продаж бензапілы, украдзенай з двара дома па вуліцы Камсамольскай у райцэнтры.
Засмучаны адмовай дзяўчыны, мясцовы Рамэа не знайшоў лепшага выкіда эмоцыям, чым пашкодзіць чужую маёмасць. Разам з сябрам на аўтадарозе Ляхавічы-Сваятычы недалёка ад вёскі Флер’янова вывернулі дарожныя знакі. Супраць падлеткаў узбуджана крымінальная справа.
Віталій ЛАБАНАЎ, начальнік РАСК.