Вы хацелі спытаць пра лекі?
Навучэнцы ЛДАКа аднымі з першых паўдзельнічалі ў акцыі.
Шырокім асартыментам лекавых прэпаратаў, вітамінаў і іншай фармацэўтычнай прадукцыі сёння нікога не здзівіш. Адно лякарства можа быць прадстаўлена некалькімі вытворцамі і мець розную назву. Не згубіцца ў гэтым выбары і не пераплаціць за разрэкламаваны прадукт – справа няпростая. У цэнтральнай раённай аптэцы № 56 на мінулым тыдні прадстаўнікі айчыннай фармпрамысловасці сустрэліся з жыхарамі Ляхавіччыны. Спецыялісты «Фармлэнда», «Рубікона», «Лекфарма» і «Экзона» расказвалі пра сваю прадукцыю і кантроль якасці за ёй, пазнаёмілі з навінкамі, правялі завочную экскурсію па сваіх прадпрыемствах.
У гэты ж дзень у аптэцы можна было вымераць артэрыяльны ціск, узровень цукру ў крыві, вылічыць індэкс масы цела, атрымаць кансультацыю ўрача, а пры неабходнасці і выпісаць рэцэпт.
– Фармат такой сустрэчы, калі можна задаць пытанні прадстаўнікам айчыннай фармвытворчасці, выбраны ўпершыню. Па зацікаўленасці насельніцтва бачым, што такую практыку трэба працягваць, – адзначае намеснік загадчыцы ЦРА №56 Таццяна Салодкая.
25 верасня, у Сусветны дзень фармацэўта, у аптэцы зноў адбудзецца акцыя. На гэты раз – кансультацыя ад «Фармлэнда». Акрамя таго, з 25 па 29 верасня ў аптэках Брэсцкага РУП «Фармацыя» ўсім пакупнікам на айчынныя лекі будзе прадастаўлена 7-працэнтная скідка.
Наталля ПЕРАПЕЧКА.
