Заблудзіла
У мінулую суботу кампанія з чатырох ляхавічан адправілася за грыбамі ў наваколлі Свяціцы. А ў 15 гадзін у РАНС паступіла паведамленне: згубілася 37-гадовая жанчына. На яе пошукі адправіліся выратавальнікі, міліцыянеры, работнікі лясгаса. У 19 гадзін да жанчыны ўдалося дазваніцца па мабільным тэлефоне, які, на шчасце, яна ўзяла з сабой. Аўтамабіль МНС перамяшчаўся з уключаным спецыяльным гукавым сігналам, жанчына пачула сірэну, што і дапамагло ёй рухацца ў правільным накірунку. У хуткім часе яе вывелі з лесу.
З дыму разгарэлася полымя
Экстранная эвакуацыя спатрэбілася пяці чалавекам у Зубелевічах. Вечарам 24 верасня супрацоўнікі РАНС па выкліку выехалі на ліквідацыю задымлення ў шматкватэрным жылым доме. Як высветлілася пасля, з-за неасцярожнасці пры курэнні загарэлася канапа на балконе. Пажар разрастаўся, а людзі, якія знаходзіліся ў кватэры, пра гэта нават і не падазравалі. І толькі праз нейкі час пачулі пах дыму і пачалі тушыць узгаранне самастойна. Не атрымалася.
Дарэчы, такі выпадак не першы ў гэтай кватэры. Але папярэднія так і не навучылі гаспадароў, што з агнём жартаваць нельга.
Сяргей ГАТОЎЧЫЦ, першы намеснік начальніка РАНС.