Сагрэцца і не атруціцца
Ноччу 25 кастрычніка ў райбальніцу са Счаснавіч з дыягназам «атручэнне чадным газам» была дастаўлена 80-гадовая вяскоўка. Папярэдняя версія здарэння дачасна закрытая пячная засаўка.Чаму печка становіцца крыніцай небяспекі? Здаецца, утульна-цёплы сюжэт: прагарэлі дровы ў печы, засаўка дымавой трубы зачынена, у топцы – чырвоныя вугалькі. Вуглі, што тлеюць, пры недахопе паветра ўтвараюць чадны газ, які пранікае ў памяшканне праз негерметычныя ўчасткі печкі. Чадны газ – бескаляровы, без паху і вельмі небяспечны.
Так што імкненне захаваць цяпло пры дапамозе ранняга закрыцця пячной заслонкі можа мець сумныя наступствы. За мінулыя выхадныя ў вобласці зарэгістраваны 3 выпадкі атручэння чадным газам у Лунінецкім, Івацэвіцкім і Ганцавіцкім раёнах. У выніку 2 чалавекі загінулі, яшчэ двое своечасова былі дастаўлены ў бальніцу.
Тым, хто ацяпляе дом печкай, неабходна запомніць: нельга зачыняць засаўку, пакуль у топцы гарыць блакітна-сіняе полымя. Рэкамендуецца рабіць гэта праз 2 гадзіны пасля прапальвання печы. Важнае значэнне мае і стан крыніцы цяпла і дымахода.
У шматкватэрніках атручэнні фіксуюцца, як правіла, у міжсезонне: цэнтральнае ацяпленне не ўключана, а жыльцы грэюцца ад газавых прыбораў. Пры недастатковай вентыляцыі яны таксама могуць стаць прычынай трагедыі.
Аўтамабілістам не варта выпрабоўваць лёс, знаходзячыся пры працуючым рухавіку ў зачыненым гаражы.
Выкананне правілаў бяспекі не патрабуе вялікіх намаганняў і выдаткаў, але засцерагае ад бяды і захоўвае жыццё.
Марына КАСАКОВІЧ,
спецыяліст РАНС.
