Калядная саната
Сёлета гарадская ёлка памяняла месца сваёй “дыслакацыі”: лясная прыгажуня па-гаспадарску размясцілася на плошчы Леніна. Новы не толькі адрас, але і ёлачнае ўбранне: цацкі, гірлянды. Прыгожа!
Па традыцыі
пачатак навагоднім гулянням быў дадзены тэатралізаваным прадстаўленнем “Калядная саната”. Ляхавічан і гасцей горада з надыходзячымі Калядамі і Новым годам шчыра віншаваў старшыня райвыканкама Дзмітрый Бурдук, які падзякаваў землякам за добрасумленную працу, прафесійныя здабыткі і пажадаў здароўя, шчасця, дабрабыту ў надыходзячым 2012-м годзе.
На прыгожа ўбранай імправізаванай сцэне і вакол ёлкі вечарам у мінулую пятніцу адбывалася шмат чаго цікавага, казачнага, запамінальнага і вясёлага. Нават адсутнасць снегу не сапсавала настрой няўрымслівым і радасным дзецям, а таксама дарослым, якія прыйшлі на “Санату”. Дзяды Марозы і Снягурачкі і іншыя казачныя персанажы забаўлялі народ, прапаноўвалі конкурсы і гульні, чыталі вершы і спявалі песні, расказвалі гумарэскі і загадвалі загадкі і, канешне, віншавалі – з размахам, урачыста і весела.
Добры настрой землякам стваралі лепшыя самадзейныя артысты Ляхавіччыны.
Цікавы, незабыўны карагод навагодніх і калядных прадстаўленняў, які пачаўся ў пятніцу, 23 снежня, працягнецца да пачатку студзеня ўжо 2012 года.
А пакуль у цэнтры дадатковай адукацыі прайшло прадстаўленне для дзяцей-інвалідаў і іх бацькоў “Навагодні цуд”. Педагогі ўстановы падарылі рабятам з абмежаванымі магчымасцямі сапраўдную святочную казку. Даспадобы прыйшліся юным і навагоднія падарункі, падрыхтаваныя тэрытарыяльным цэнтрам сацыяльнага абслугоўвання насельніцтва, аддзелам па справах моладзі райвыканкама, райкамам ГА БРСМ і раённай арганізацыяй таварыства Чырвонага Крыжа.
У панядзелак старшыня райвыканкама Дзмітрый Бурдук і старшыня раённай арганізацыі ГА ”Белая Русь” Святлана Юрлевіч наведалі пацыентаў дзіцячага аддзялення райбальніцы і ўручылі падарункі, сабраныя падчас акцыі “Калядны падарунак”.
27 снежня Дзед Мароз, Снягурка і іншыя казачныя героі запрасілі ў цэнтр дадатковай адукацыі на ранішнік дзяцей-сірот – выхаванцаў прыёмных сем’яў. Рабяты атрымалі падарункі ад райкама прафсаюза работнікаў адукацыі і навукі, “Белай Русі”, кааппрама.
