Ляхавічанін захоўваў дома 80 літраў самагоннай брагі
Апошнім часам пачасціліся выпадкі вырабу і захоўвання самагону. За лістапад гэтага года супрацоўнікі міліцыі склалі некалькі адміністрацыйных пратаколаў на ляхавічан, у якіх знойдзены самагонныя апараты і адпаведная алкагольная прадукцыя. Так, напрыклад, ляхавічанін захоўваў дома 80 літраў самагоннай брагі і 1,2 літра самагону, жыхар вёскі Цыгань – 28 літраў самагоннай брагі. А ў жыхаркі вёскі Галаўнінцы супрацоўнікі міліцыі знайшлі 38 літраў самаробнай градуснай прадукцыі. Алкагольны «прадукт» і апараты канфіскаваны.Картачныя зладзеі
У адносінах неўстаноўленай асобы распачата крымінальная справа: зламыснік, атрымаўшы несанкцыянаваны доступ да камп’ютарнай інфармацыі аб карт-рахунку пенсіянеркі вёскі Кукава Ганцавіцкага раёна, аплаціў набытыя ў крывошынскім магазіне «Прадукты» тавары на агульную суму 59 рублёў 3 капейкі.
Яшчэ адзін выпадак грашовага крадзяжу таксама звязаны з незаконным выкарыстаннем плацежнай карткі. Ляхавічанін напісаў заяву на свайго сына, які з яго карткі ўкраў больш за 140 рублёў.
Пасля дачнага – сезон крадзяжоў
Крадзяжы з дач, асабліва па завяршэнні дачнага сезона, – з’ява распаўсюджаная. Вабяць злодзеяў такія адрасы: гаспадароў часова няма, адсутнічаюць ахоўныя рашоткі на вокнах, не заўсёды надзейныя і моцныя дзверы. Так, два жыхары Канюхоў разбілі акно, залезлі ў дачны дом і ўкралі ва-дзяную помпу, мікрахвалёвую печ, электрачайнік, магнітафон і шмат іншага на суму 528 рублёў. Падазроныя затрыманы, частка ўкрадзеных рэчаў канфіскавана.
Са зводкамі РАУС знаёмілася Маргарыта КУХТА.
