Экзамен на народнасць

Эсперыментальная вакальная група «Берагіня» Дараўскага сельскага Дома культуры

Днямі двум калектывам з нашага раёна – эксперыментальнай вакальнай групе «Берагіня» Дараўскага сельскага Дома культуры і інструментальнаму ансамблю «Джаз-Арт» настаўнікаў Ляхавіцкай дзіцячай школы мастацтваў – пастановай Міністэрства культуры прысвоены званні «народны».
Свой шлях да гэтай высокай адзнакі «Берагіня» пачала 7 гадоў назад. Заваявала папулярнасць у землякоў, нязменна зрывае апладысменты і па-за межамі раёна. У творчым багажы дыпломы і міжнародных фестываляў. У рэпертуары «Берагіні» як народныя песні ў сучаснай апрацоўцы, так і эстрадныя, у тым ліку і ў суправаджэнні біт-бокса. Не стамляюцца эксперыментаваць і шукаць нешта адметнае.
«Берагіня» сёння – гэта 9 самадзейных спевакоў, аб’яднанных любоўю да песні. Кіраўнік калектыву Вольга Цімашок адзначае, што для іх вельмі важна сваёй творчасцю радаваць людзей, дарыць шчаслівыя імгненні. Сёлета калектыў «даспяваўся» да ганаровага права – быць занесеным на раённую Галерэю славы.
«Джаз-Арт» яшчэ нядаўна быў «Дыксілендам». Калектыў, які шмат гадоў узначальвае Барыс Шабановіч, змяніў назву, калі здаваў экзамен на званне народнага. Аказалася, што ў вобласці маецца цёзка. Але змена назвы ніяк не адбілася на майстэрстве – выступленні музыкантаў заўсёды яркія і відовішчныя, выклікаюць шмат станоўчых эмоцый. У «Джаз-Арце» ўсе 7 удзельнікаў – прафесіяналы, маюць музычную адукацыю. Гітара, саксафон, трамбон, труба, кларнет, ударныя і клавішныя інструменты ў руках майстроў ажываюць, выдаюць у сугуччы адметны музычны букет. У творчай біяграфіі «Джаз-Арта» выступленні не толькі на айчынных пляцоўках. У інструментальнага ансамбля настаўнікаў мастацкай школы таксама нямала ўзнагарод. І яму вельмі пасуе званне народнага.
Наталля ПЕРАПЕЧКА.

Падзялiцца:
  •  
  •  
  •  
  •  
  •  
  •  
  •  

Добавить комментарий

Ваш e-mail не будет опубликован. Обязательные поля помечены *