Выдатна, гімназія!
Да гэтага адказнага і важнага экзамену педагагічны калектыў і вучні гімназіі рыхтаваліся грунтоўна.
Першую акрэдытацыю ўстанова паспяхова прайшла ў 2006 годзе. І праз 5 гадоў павінна была пацвердзіць свой статус.
Як расказаў дырэктар гімназіі Леанід Калбаса, акрэдытацыя праводзілася ў 2 этапы. З 14 лістапада па 17 снежня 2011 года ўнутры навучальнай установы праводзіўся самакантроль, падчас якога дырэкцыя наведвала ўрокі, пазакласныя мерапрыемствы, праводзіліся кантрольныя зрэзы па розных прадметах, правяраліся класныя журналы, дзённікі і сшыткі вучняў, метадычная работа настаўнікаў. Справаздача была даслана ў Дэпартамент кантролю якасці адукацыі Міністэрства адукацыі Рэспублікі Беларусь.
Ужо сёлета з 13 па 16 студзеня прайшоў заключны этап акрэдытацыі. Камісія ў складзе 6 прадстаўнікоў розных навучальных устаноў Беларусі пад кіраўніцтвам кансультанта Дэпартамента Ірыны Грышчанка правяла праверку дзейнасці гімназіі на яе адпаведнасць заяўленаму статусу. Па словах Леаніда Калбасы, члены камісіі вывучалі матэрыяльна-тэхнічную базу ўстановы, работу бібліятэкі, навукова-метадычную работу, правяралі, як выкарыстоўваюцца інфармацыйныя рэсурсы і арганізоўваецца ідэалагічнае суправаджэнне адукацыйнага працэсу. Выбарачна наведвалі ўрокі ў розных класах і па розных прадметах. Асабліва цікавілі членаў камісіі такія школьныя прадметы як руская, беларуская і замежныя мовы, матэматыка, геаграфія, хімія і біялогія. Не засталася ў баку ад пільнай увагі правяраючых і выхаваўчая работа. Сярод шматлікіх пазакласных мерапрыемстваў асабліва ўразіла інтэлектуальная гульня, якую вёў знакаміты ігрок клуба знаўцаў Леанід Клімовіч. Змястоўна прайшло і пасяджэнне навуковага таварыства вучняў.
Канчатковы вердыкт камісіі Дэпартамента кантролю якасці ведаў: гімназія адпавядае заяўленаму статусу і атрымала пацвярджэнне акрэдытацыі на наступныя 5 гадоў.
Галіна КАНЬКО