Жанчына. І гэтым усё сказана
Кіраўнік і дэпутат, грамадскі дзеяч і навуковец, педагог і медык, аператар машыннага даення і майстар на вытворчасці, псіхолаг і энергетык, палявод і вадзіцель, інжынер і будаўнік, прадавец і дыспетчар, культработнік і трэнер, ваеннаслужачы і міліцыянер… – усе гэтыя прафесіі ў граматыцы мужчынскага роду. Але імі паспяхова авалодалі жанчыны і віртуозна спраўляюцца на практыцы, дабіваючыся высокіх вынікаў і прызнання.
А яшчэ жанчына – гэта каханая, жонка, матуля, гаспадыня. Прычым паспявае аднолькава выдатна справіцца з усімі гэтымі ролямі. І яшчэ ў жыццёвым кругавароце важна не забывацца пра сябе любімую, абавязкова знайсці час, каб прайсціся па магазінах і купіць абноўку, сустрэцца з сяброўкамі і пагаварыць пра сваё, заняцца справай для душы, паглядзець серыял і пачытаць чарговы раман ці дэтэктыў, пабываць на сайце “аднакласнікі” і пагаварыць па тэлефоне.
Нашы жанчыны ведаюць не толькі сакрэты абаяльнасці і прывабнасці, але і як знайсці шлях да сэрца мужчыны, як правільна выхоўваць дзяцей і прыбыткова весці сямейны бюджэт. Гавораць, што сіла жанчыны ў яе слабасці. А жанчыны, незалежна ад узросту, умеюць так выкарыстоўваць свае “слабасці”, што дабіваюцца любой пастаўленай мэты, а мужчыны з задавальненнем і радасцю выконваюць іх пажаданні. І пры гэтым ніяк не могуць разгадаць сакрэт сучасных прыгажунь, чараўніц. Тайна застаецца тайнай.
Амаль пра кожную жанчыну Ляхавіччыны можна сказаць шмат шчырых і цёплых слоў, выказаць ім захапленне, падзяку і пашану. Гэта адносіцца і да нашых зямлячак – намесніка дырэктара ДП “Нача” Галіны Рамейка, галоўнага эканаміста ААТ “Ляхавіцкі кансервавы завод” Вольгі Бурак, інжынера-будаўніка СВК “Жарабковічы” Людмілы Мікуліч, аператара машыннага даення СВК “Шлях новы” Юліі Малевіч, аператара па адкорме цялят ААТ “Ляхавіцкі райаграсэрвіс” Аляўціны Буцько, брыгадзіра паляводчай брыгады СВК “Ляхавіцкі” Святланы Радом-скай. Менавіта яны прадстаўлялі “прыгожую” палову аграпрамысловага комплексу раёна на святочных мерапрыемствах, прымеркаваных да 8 Сакавіка, якія ладзіліся ў Пінску.