Дарогамі памяці
Да Дня працы і Дня Перамогі ў Вялікай Айчыннай вайне быў прымеркаваны спартыўна-патрыятычны велапрабег, што прайшоў 28 красавіка па тэрыторыі Баранавіцкага і Ляхавіцкага раёнаў, і ў якім удзельнічалі дэлегацыі абодвух раёнаў на чале з кіраўнікамі райвыканкамаў Дзмітрыем Бурдуком і Мікалаем Язубцом.
— Гэты велапрабег — своеасаблівая даніна павагі нашым шаноўным ветэранам, якія адстаялі свабоду і незалежнасць свайго народа, сваёй краіны ў гады ваеннага ліхалецця, аднаўлялі гарады і вёскі ў пасляваенныя гады дзеля будучых пакаленняў. Хочацца, каб нашчадкі беражліва шанавалі памяць пра Вялікую Перамогу, і каб гэтае сапраўды народнае свята асацыіравалася толькі са светлымі і радаснымі пачуццямі, а пра вайну нашы дзеці і ўнукі ведалі толькі з кінастужак, кніг і ўспамінаў. А яшчэ велапрабег — гэта рэальная і вельмі дзейсная прапаганда здаровага ладу жыцця, асабліва для моладзі, — так ахарактарызаваў асноўную ідэю мерапрыемства старшыня Ляхавіцкага райвыканкама Дзмітрый Бурдук.
Стартаваў велапрабег у вёсцы Лаўрынавічы Баранавіцкага раёна, дзе былі ўскладзены кветкі да помніка загінуўшым воінам. Сустрэча дэлегацый Баранавіцкага і Ляхавіцкага раёнаў адбылася ў вёсцы Адахаўшчына каля мясцовага сельскага Дома культуры. З прывітальным словам да ўдзельнікаў мерапрыемства звярнуўся старшыня Баранавіцкага райвыканкама Мікалай Язубец, які падзякаваў за цёплы і сяброўскі прыём на гасціннай ляхавіцкай зямлі.
— Упэўнены, што такое сумеснае патрыятычна-спартыўнае мерапрыемства стане стымулам для больш цеснага супрацоўніцтва ў розных сферах паміж раёнамі-суседзямі. Разам мы — стваральная сіла. І гэта ўзаемавыгаднае супрацоўніцтва дасць свае вынікі ў вытворчасці, адукацыі, культуры і спорце. Мы і далей будзем працаваць так, каб Баранавіцкі і Ляхавіцкі раёны развіваліся, станавіліся больш заможнымі, працвіталі — усё гэта дзеля людзей. А сённяшняе свята прыцягне ўвагу землякоў і стане своеасаблівай прапагандай спорту і здаровага ладу жыцця, — зазначыў Мікалай Язубец.
Кіраўнікі дэлегацый абмяняліся сувенірамі.
Дзмітрый Бурдук, які працаваў амаль 4 гады на баранавіцкай зямлі, павіншаваў удзельнікаў велапрабегу з надыходзячымі святамі і пажадаў здароўя, шчасця, натхнення і працвітання.
Пасля невялікага канцэрта, падрыхтаванага ўдзельнікамі мастацкай самадзейнасці Ляхавіцкага раёна, веламотакалона накіравалася ў падарожжа па родных мясцінах. Удзельнікі велапрабегу спыніліся каля помнікаў і абеліскаў у вёсках Крошын, Стайкі, Арабаўшчына, наведалі музей-сядзібу Адама Міцкевіча ў Завоссі, а таксама ўсклалі кветкі да мемарыяльнага комплексу загінуўшым у канцэнтрацыйным лагеры ў Калдычова і каля помніка першага Героя Беларусі Уладзіміра Карвата. Фінішаваў святочны велапрабег у вёсцы Сталовічы.
Галіна КАНЬКО