У дзяцей ёсць надзейны абаронца. Ляхавіцкі СПЦ у абласным конкурсе ўзнагароджаны дыпломам II ступені
Напярэдадні Міжнароднага дня абароны дзяцей у Баранавічах прайшоў абласны конкурс “Лепшая сацыяльна-педагагічная ўстанова”. Яго арганізатары – упраўленне адукацыі Брэсцкага аблвыканкама і абласны інтытут развіцця адукацыі вызначылі ў адборачным туры для ўдзелу ў фінале шэсць лепшых з лепшых устаноў. Сярод іх і СПЦ г. Ляхавічы.
Калектыў, каб найбольш поўна прэзентаваць сваю дзейнасць, да іспыту падышоў творча і прафесіянальна. Візітка “Адзін дзень з жыцця ўстановы” адлюстраваў шматлікія напрамкі яе дзейнасці і зладжаную камандную работу спецыялістаў. У яшчэ аднім заданні – абароне вопыта работы за тры гады – прадэманстравалі цеснае ўзаемадзеянне СПЦ са школамі і дзіцячымі садкамі раёна, з бацькамі і іх дзецьмі, свае дасягненні, сярод якіх галоўнае – змяншэнне ў раёне колькасці дзяцей-сірот. Дасягнута гэта карпатлівай і адказнай работай па раннім выяўленні сямейнай неўладкаванасці і папярэджанні сацыяльнага сіроцтва.
У выніку ва ўрачыстай абстаноўцы на сцэне Палаца дзіцячай творчасці г. Баранавічы дыплом II ступені ўпраўлення адукацыі Брэсцкага аблвыканкама ўручаны дырэктару Наталлі Пішч у намінацыі “Лепшы сацыяльна-педагагічны цэнтр”.
Дарэчы, СПЦ у нашым раёне абараняе інтарэсы непаўналетніх ужо амаль два дзесяцігоддзі. За гэты час назапашаны вялікі вопыт, склаліся дастойныя традыцыі і дзейсная сістэма работы.
Наталля ПЕРАПЕЧКА.
Фота з архіва СПЦ.
