Хто апошні ў будатрад?!
Для кагосьці лета асацыіруецца з адпачынкам, у выпускнікоў — з экзаменамі, тэстамі і ўступнай кампаніяй, а для некаторых старшакласнікаў і студэнтаў — з рэальнай магчымасцю самастойна зарабіць грошы для ўласных патрэб. Будатрадаўскі рух (асноўная форма працаўладкавання студэнцкай і вучнёўскай моладзі) з кожным годам набывае ўсё большы размах і карыстаецца зайздроснай папулярнасцю сярод юнакоў і дзяўчат.
Зразумела, студэнтам прасцей: амаль пры кожнай ВНУ створаны атрады працоўнай моладзі, якія на летні семестр арганізавана ўладкоўваюцца на будаўнічыя аб’екты, добраўпарадкаванне тэрыторый, адпраўляюцца важатымі ў аздараўленчыя лагеры як Беларусі, так і замежжа. Нямала вакансій для аматараў папрацаваць падчас канікулаў у сталіцы і абласных цэнтрах, вялікіх гарадах. А на што можна спадзявацца юнакам і дзяўчатам Ляхавіцкага раёна, якія не жадаюць сядзець без справы ўсе тры летнія месяцы?
Ім можна звярнуцца за дапамогай у розныя інстанцыі, у першую чаргу — у службу занятасці. Як расказала намеснік начальніка ўпраўлення па працы, занятасці і сацыяльнай абароне райвыканкама Людміла Ланкуць, у раёне аказваецца дапамога моладзі ў працаўладкаванні на пастаянную ці часовую работу, набыцці прафесіі. Супрацоўнікі сектара занятасці падбіраюць у арганізацыях, прадпрыемствах раёна працоўныя месцы для вучнёўскай моладзі (рабят з 14 гадоў) на летні перыяд. Сёлета запыты накіраваны на 31 прадпрыемства. 10 арганізацый гатовы забяспечыць працоўным месцам 89 маладых людзей. Сярод патэнцыяльных работадаўцаў — СВК «Жарабковічы», «Шлях новы», ААТ «Ляхавіцкі райаграсэрвіс» (сельгаспрадпрыемствы прапануюць вакансіі жывёлаводаў, раслінаводаў, прыбіральшчыкаў і г.д.), райпо, кааппрам, «Інтэрлак», завод «Металапластмас». Але, як адзначыла Людміла Ланкуць, пакуль толькі адзін школьнік звярнуўся ў службу занятасці з жаданнем папрацаваць летам. Найбольшы наплыў маючых намер працаўладкавацца на канікулах чакаецца пасля экзаменаў.
Службай занятасці распрацаваны 2 праекты па арганізацыі часовай працоўнай занятасці вучнёўскай моладзі з выкарыстаннем сродкаў фонду сацыяльнай абароны. Так, сёлета, як і ў папярэднія гады, выдатная магчымасць зарабіць грошы падчас канікулаў з’явіцца ў 14 навучэнцаў Ляхавіцкага дзяржаўнага аграрнага каледжа. Будучыя спецыялісты сельскай гаспадаркі на працягу 9 дзён будуць займацца добраўпарадкаваннем і рамонтам студэнцкіх інтэрнатаў. На гэтыя мэты з ФСА выдаткоўваецца 17 мільёнаў рублёў, у тым ліку 8 мільёнаў рублёў — на заработную плату навучэнцаў.
Другі праект рэалізуецца сумесна з аддзелам адукацыі. 40 рабят з СШ № 2, Крывошынскай і Навасёлкаўскай СШ будуць наводзіць парадак, азеляняць тэрыторыю вакол сваіх школ, зоймуцца ўстаноўкай драўлянай агароджы, рамонтам школьнай мэблі і іншымі карыснымі справамі. Агульная сума затрат на праект — 16 мільёнаў рублёў. Як расказала галоўны спецыяліст аддзела адукацыі Тамара Сайко, для залічэння ў атрад абавязкова трэба прад’явіць пісьмовы дазвол ад бацькоў, медыцынскую даведку аб стане здароўя. Юныя працаўнікі будуць забяспечаны спецадзеннем. Канешне, праводзіцца інструктаж па тэхніцы бяспекі. У атрадах у асноўным рабяты з мнагадзетных і малазабяспечаных сем’яў.
Па традыцыі вучні Крывошынскай СШ будуць добраўпарадкоўваць тэрыторыю паркавага ансамбля Рэпіхава. Акрамя таго, рабяты абновяць да новага навучальнага года калідоры, спартыўную і актавую залы, зоймуцца іншымі надзённымі справамі. Працуюць на добраўпарадкаванні тэрыторыі сваёй навучальнай установы, рамантуюць спартыўную залу 10 хлопчыкаў і дзяўчынак з Навасёлкаўскай СШ. Трапіць у працоўны дэсант змаглі толькі самыя працавітыя, ініцыятыўныя, актыўныя вучні.
Не застаецца ў баку ад працаўладкавання ў летні час і самая масавая маладзёжная арганізацыя краіны — Беларускі рэспубліканскі саюз моладзі. Па словах першага сакратара райкама БРСМ Ларысы Юшкевіч, яшчэ задоўга да лета ў многія арганізацыі раёна былі дасланы запыты з просьбай праінфармаваць пра вакантныя месцы, куды могуць падчас канікулаў працаўладкавацца маладыя людзі. Райкам БРСМ заключыў дагавор з СТАА «Завод упаковачных матэрыялаў» аб стварэнні на базе прадпрыемства маладзёжнага атрада ў колькасці 10 чалавек. Такі ж дагавор заключаны і з аддзелам адукацыі — у аздараўленчым лагеры «Чайка» падчас 3-й змены будзе дзейнічаць маладзёжны дэсант. На замены водпускаў асноўных работнікаў гатовы прыняць на працу ў якасці паштальёнаў і грузчыкаў раённы вузел паштовай сувязі і райпо. Абавязковая ўмова — узрост павінен быць не маладзейшым за 18 гадоў.
Як адзначыла Ларыса Юшкевіч, у рабят ёсць магчымасць працаўладкавацца з дапамогай інтэрнэту. Для гэтага дастаткова зарэгістравацца на афіцыйным сайце БРСМ і пакінуць заяўку са сваімі анкетнымі данымі. Дарэчы, такой магчымасцю ўжо скарысталіся 2 вучаніцы СШ № 2 і Навасёлкаўскай СШ.
Некаторыя юнакі і дзяўчаты самастойна і з дапамогай бацькоў знаходзяць прымяненне сваім сілам і энергіі: адпраўляюцца ў лес за ягадамі і грыбамі, якія потым здаюць нарыхтоўшчыкам ці прадаюць на рынку, бяруцца і за часовую работу, напрыклад, прадаўцоў рознічнага гандлю ці квасу. Іншыя ўладкоўваюцца ў ТАА «Трансэлектракамплект», «Інтэрлак», на завод «Металапластмас» і г. д.
Хто хоча працаваць, той работу абавязкова знойдзе. Ёсць прапановы.
Галіна КАНЬКО
