Страявым да мары. У Ляхавічах прызыўнікі атрымалі павесткі
Страявы крок пакуль не адточаны, на каманды яны рэагуюць яшчэ нязладжана. Але ідэальнае выкананне ўсіх армейскіх загадаў і не патрабуецца ад людзей у цывільным, ізноў жа – пакуль у цывільным. Мінулая пятніца ў раёне адзначылася важнай падзеяй: паўсотні маладых ляхавічан атрымалі павесткі – пуцёўкі ў ваеннае жыццё. Ярка, святочна, прыгожа ў Ляхавічах прайшоў Дзень прызыўніка.
Такі фармат, здаецца, фармальнай працэдуры – апошняга этапу восеньскага прызыву – юнакам спадабаўся. Шчыра прызнаваліся, што і не чакалі столькі святочнасці ад гэтай падзеі.
Cтаршыня раённага Савета дэпутатаў Леанід Калбаса прапанаваў зрабіць святкаванне Дня прызыўніка штогадовай традыцыяй. Ён падкрэсліў: надзвычай важна жыць у міры, не ведаць ваеннага ліхалецця. І наша дзяржаўная палітыка накіравана на гэта. А задача тых, хто ў Дзень прызыўніка атрымаў павестку, – абараняць сваю краіну, свае сем’і, стаяць на варце мірнага жыцця.
Будучы абаронца Айчыны Антон Дыдышка не хаваў радасці. Пераканаўся: гэты дзень асаблівы не толькі для яго, але і для тых, хто хутка будзе стаяць з ім у адным страі, для родных і блізкіх, якія з нецярпеннем будуць чакаць вестачку ад салдата, для многіх нават незнаёмых людзей:
– Сённяшняя падзея надала яшчэ больш упэўненасці, што мы робім патрэбную справу, што ёсць дзеля каго і чаго служыць. І галоўная задача кожнага з нас, прызыўнікоў, – апраўдаць давер, верна і годна выканаць свой грамадзянскі абавязак.
Без пяці хвілін салдатаў сустракалі ў зале ГДК гучнымі апладысментамі. І хоць у вачах прызыўнікоў хлапецкая бесшабашнасць, прысутнічае юнацкі максімалізм, яны разумеюць: армія зменіць кожнага, зробіць дарослым. І нашы хлопцы да гэтага гатовы.
Намеснік старшыні райвыканкама Святлана Юрлевіч гаварыла, што сваім цвёрдым і ўпэўненым «так» на пытанне «ці хочаце служыць у арміі», юнакі чарговы раз пацвердзілі: нам ёсць на каго спадзявацца.
Са школы Іван Шпак марыў апрануць армейскую форму, нават планаваў паступаць на ваенны факультэт, але адвучыўся на настаўніка фізкультуры ў Палескім дзяржаўным універсітэце, размеркаваўся ў Астравецкую школу і, цытую, «толькі цяпер наблізіўся да мары»:
– Без перабольшання, чакаю, калі пачнуцца мае салдацкія будні, калі пачну спасцігаць страявую падрыхтоўку, буду асвойваць спецыяльныя веды. Тым больш, трапіў у паветрана-дэсантныя войскі, як і хацеў. Там служылі мае сябры, дарэчы, і цяпер ёсць, як кажуць, родныя людзі. Менавіта ў 38-й асобнай гвардзейскай дэсантна-штурмавой брыгадзе служыў наш зямляк Яўгеній Жарскі, які разам з баявым таварышам Дзмітрыем Страчуком ўзнагароджаны медалём «За адвагу». Армія – школа, дзе выхоўваюць мужнасць, адказнасць, дысцыплінаванасць. Хачу стаць яе вучнем. А яшчэ запаветная мара – скачок з парашутам – цяпер абавязкова спраўдзіцца.
Чалавек, якому давялося служыць, зразумець важнасць і неабходнасць армейскай справы, яе ўрокі засвоіць на ўсё жыццё. Старшыня раённай арганізацыі Беларускага саюза афіцэраў Аляксей Навіцкі ўпэўнены: у арміі важна адчуваць, што ты не адзін – побач надзейнае плячо таварыша, што салдаты, якія з табой у адным страі, не выпадковыя людзі, яны –
каманда. У арміі не здаюць нарматывы паасобку – здаюць падраздзяленнямі. Не выканае рота даручэнне, калі хоць адзін салдат праваліў сваю задачу. Такая вось вызначальная роля армейскага калектыву.
Ёсць вобразнае меркаванне, што разам з юнаком службу праходзяць і яго родныя: сумуюць, чакаюць званочка і нават у век інфармацыйных тэхналогій заглядаюць у паштовую скрыню з надзеяй атрымаць шчырыя радкі ад сына, унука, мужа, маладога чалавека ці сябра… Бацькоўская падтрымка ў многім дазваляе справіцца са складанасцямі, што знаходзяцца за пунктам КПП, дзе ўсё падпарадкавана агульнаму раскладу.
З 14 па 28 лістапада паўсотні маладых ляхавічан папоўняць рады Узброеных Сіл і іншых воінскіх фарміраванняў краіны.
– Калі вызначалі месца службы, прыслухоўваліся да жадання кожнага прызыўніка, глядзелі вынікі медагляду, асаблівая ўвага – маральна-псіхалагічным, прафесійным якасцям маладых людзей, характарыстыцы з месцаў вучобы і работы. Восем ляхавічан будуць праходзіць службу ў паветрана-дэсантных войсках, сем – у пагранічных, многія выбралі службу ва ўнутраных вой-сках, – расказвае начальнік адасобленай групы Ляхавіцкага раёна ваеннага камісарыята горада Баранавічы, Баранавіцкага і Ляхавіцкага раёнаў Аляксандр Байчык.
Падарункі і віншаванні прызыўнікам падрыхтаваў райкам БРСМ.
Пажаданні лёгкай і паспяховай службы, надзейных сяброў і самых лепшых камандзіраў гучалі ў адрас галоўных дзеючых асоб прызыўнога дня. А музычную паштоўку, якая проста ўзрушыла кожнага сваёй шчырасцю, энергічнасцю, душэўнасцю, падрыхтавалі вакальна-інструментальны ансамбль з 8-й радыётэхнічнай брыгады «Бязмежнасць» і школьнікі раёна.
Маргарыта КУХТА.
Фота аўтара.БОЛЬШ ФОТА ТУТ
«Так і здарылася. Мы выхавалі дастойнае пакаленне. Але, на жаль, у глабальным і маральным сэнсе свет не стаў лепшым. Барацьба дабра і зла не спыняецца. Яна пранікае ў духоўную, сацыяльную, эканамічную і палітычную сферы. Праз кнігі, навіны, фільмы, рэкламу, моду. Гэта фронт, дзе не страляюць, але таксама б’юць на паражэнне – толькі праз свядомасць людзей. Гэта самае небяспечнае і самае страшэннае», – сказаў Прэзідэнт Беларусі на сустрэчы з актывам БРСМ.
Не страціць у такой бітве сваё маральнае аблічча, свой свет – гэта подзвіг, падкрэсліў Кіраўнік дзяржавы. Задача моладзі, паводле яго слоў, – адстойваць высокія ідэалы сумленнасці і справядлівасці, традыцыйныя духоўныя каштоўнасці ў свеце скептыкаў і цынікаў, у свеце канфліктаў і войнаў, якія няхай і не закранулі беларускую зямлю, але падышлі вельмі блізка да яе межаў. «Наша з вамі задача – уберагчы гэты кавалачак ад узрушэнняў, бо няма дзе будзе жыць ні нам, ні вам, ні тым больш нашым дзецям», – падкрэсліў Прэзідэнт.Па матэрыялах БЕЛТА.
Пры такім урачыстым развітанні служыць, пэўна, будзе не так цяжка. Як гаварыцца, настроілі і наказы на дарогу далі. Армія — школа жыцця, загартоўвае хлопцаў, Служыце дастойна, дома вас чакаюць!