Гуманная выратавальная місія. Гэта пра донараў крыві

Кроў жыццёва неабходная. Донарская кроў выратоўвае жыццё, вяртае здароўе. Нягледзячы на няспынныя намаганні, пройдзе яшчэ шмат гадоў, перш чым замест донарскай крыві чалавека можна будзе ў шырокіх маштабах выкарыстоўваць яе штучныя замяняльнікі.

Пакуль сусветная навука яшчэ не навучылася штучна сінтэзаваць кроў і яе кампаненты. І іменна донары крыві і яе кампанентаў з’яўляюцца практычна адзінай надзеяй хворых, якія маюць патрэбу ў тэрміновым пераліванні крыві.

Пераліванне крыві і яе прадуктаў дазваляе штогод выратоўваць мільёны жыццяў. Кроў і прадукты крыві неабходныя для лячэння жанчын, у якіх цяжарнасць ці роды ўскладніліся развіццём
крывацёку, пацыентаў з захворваннямі крыві і к асцявога мозга, спадчыннымі анамаліямі гемаглабіну і імунадэфіцытнымі станамі; ахвяр траўмаў, надзвычайных сітуацый, бедстваў і аварый, а таксама пацыентаў, якім праводзяцца складаныя медыцынскія і хірургічныя ўмяшальніцтвы.

Добраахвотныя донары крыві фактычна гатовы дзяліцца з хворымі часцінкай сябе. Без перабольшання, гэта армія выратавання – сапраўдная, імклівая і вельмі-вельмі добрая.

Для таго, каб бяспечная кроў была даступна заўсёды і ўсюды, дзе яна неабходная, дастатковая колькасць здаровых людзей павінна рэгулярна здаваць сваю кроў на бязвыплатнай аснове, таму што іменна яны – група насельніцтва з найменшай рызыкай носьбіцтва такіх смяротна небяспечных вірусаў, як ВІЧ і вірус гепатыту.

Дарэчы, па статыстыцы, донары, якія рэгулярна здаюць кроў, практычна не хварэюць прастудай і грыпам. Акрамя таго, яны радзей пакутуюць анкалагічнымі і сардэчна-сасудзістымі захворваннямі.

Спрыяльнае ўздзеянне аказваецца і на псіхічны стан чалавека. Можна сказаць, што донарства папярэджвае атэрасклероз, захворванні печані, падстраўнікавай залозы, страўніка. Рэгулярная здача крыві садзейнічае падаўжэнню маладосці, таму што стымулюе крывятварэнне і самаабнаўленне арганізма.

Донар – не прафесія, не работа, не рамяство. Але гэтымі людзьмі ганарыцца наша рэспубліка, таму што яны дораць іншым самае каштоўнае, што не выпрацаваць ніякімі тэхналогіямі, не купіць у магазіне і не замяніць нічым іншым – сваю кроў. Не выпадкова
імя ім Донар – ад лацінскага «дарыць».

Аляксандр СЯРГЕЙ,
адказны за трансфузіялагічную дапамогу ў Ляхавіцкай ЦРБ.