Ляхавіччына:з нецярпеннем чакаюць зімы аматары падлёднай рыбалкі
Мужчына з Флер’янова пайшоў з дому 16 кастрычніка, а знайшлі яго ў вадаёме 23 кастрычніка. Абставіны трагедыі высвятляюцца. Толькі за 2 апошнія месяцы ў вобласці загінулі ў вадзе 9 чалавек — 3 упалі ў меліярацыйныя каналы, 6 — на рыбалцы.
Гэтай парой іменна рыбакі складаюць групу рызыкі, а дакладней тыя з іх, хто ігнаруе правілы бяспекі. Здавалася б, усяго выратавальная камізэлька, а яна захавала жыццё двум рыбакам на Століншчыне. Гумавая лодка, на якой яны рыбачылі, патанула, і людзі аказаліся ў вадзе. Пратрымаліся на плыву працяглы час, дзякуючы выратавальным камізэлькам.
А што ў нас? Шмат аматараў рыбнай лоўлі, як звычайна, і на беразе, і на вадзе. Многія з іх правілы бяспекі не выконваюць. Бывае, рыбакі прыходзяць на вадаёмы ў добрым падпітку…
З нецярпеннем чакаюць зімы аматары падлёднай рыбалкі — вельмі рызыкоўнай. Ім варта старанна падрыхтавацца да сезона: набыць выратавальныя камізэлькі і шнур даўжынёй 20-25 метраў, які можа спатрэбіцца для выратавання сябра-рыбака. А бацькам неабходна цікавіцца забавамі сваіх дзяцей, тлумачыць ім пра важнасць захавання зусім простых мер перасцярогі, каб вада не стала бядой.
Марыя ЦІТКО,
старшыня раённай
арганізацыі таварыства
ратавання на водах.