У Ляхавічах ушаноўвалі працаўнікоў сельскай гаспадаркі і перапрацоўчай прамысловасці АПК /фота/

27/11/2012 166 redakcyja 0 Comment

Старшыня райвыканкама Дзмітрый Бурдук прымае хлеб новага ўраджаю

І зноў лістапад запрасіў на свята рупліўцаў роднай зямлі.
Усіх, хто мае дачыненне да багатага ляхавіцкага стала, шчодра накрытага, дзякуючы нястомнай працы хлебаробаў і жывёлаводаў, механізатараў і завадчан, спецыялістаў і кіраўнікоў сельскай гаспадаркі і перапрацоўчай прамысловасці АПК.
Пад гукі духавога аркестра па вуліцы Леніна райцэнтра ў святочнай калоне прайшлі дэлегацыі гаспадарак і прадпрыемстваў, лепшыя з лепшых — героі свята, кіраўнікі раёна і ганаровыя госці. Па традыцыі былі ўскладзены вянкі і кветкі да помніка воінам-вызваліцелям. Потым святочная калона рушыла ў гарадскі Дом культуры, дзе і адбываліся асноўныя святочныя падзеі. А галоўную гарадскую вуліцу заняў незвычайны парад, у якім удзельнічала сучасная сельскагаспадарчая тэхніка.
У фае ГДК было мнагалюдна, атмасфера свята адчувалася паўсюдна. Настройвала на ўзнёслы лад музыка, цешыла вока і дражніла прыемным пахам апетытная прадукцыя, вырабленая СААТ «Ляхавіцкі малочны завод», «ААТ «Ляхавіцкі кансервавы завод», ПУП «Ляхавіцкі кааппрам». А прадукцыя ААТ «Ляхавіцкі льнозавод», якая таксама не патрабуе ніякай дадатковай рэкламы — папулярная, запатрабаваная і, галоўнае, якасная. Жадаючых прадэгуставаць прысмакі і нешта купіць было нямала. Фанфары абвясцілі пачатак свята. Са сцэны гучалі словы віншавання і шанавання за штодзённую няпростую і такую адказную сялянскую справу, вытворчыя перамогі, за любоў і пашану да зямлі-карміцелькі, за хлеб і да хлеба на стале. Сімвалічна, што першым героем свята стаў менавіта хлеб — караваі, спечаныя з зерня сёлетняга ўраджаю ў розных сельгасарганізацыях Ляхавіччыны.
Заслужаныя апладысменты гучалі ў адрас пераможцаў абласных і рэспубліканскіх спаборніцтваў у раслінаводстве і жывёлагадоўлі. Асабліва прыемна было чуць, што Ляхавіцкі раён у абласных спаборніцтвах заняў 1 месца па вытворчасці піваварнага ячменю, 2 месца — па ўборцы зерневых і зернебабовых і 3 месца — па вытворчасці цукровых буракоў.
Сёлета ўпершыню ў раёне ўручаліся пераходныя Ганаровыя сцягі за дасягненне высокіх паказчыкаў у сельскагаспадарчай галіне. З гонарам і пашанай у святочную залу іх унеслі пераможцы рэспубліканскіх і абласных спаборніцтваў. Ганаровымі сцягамі ўзнагароджаны: за дасягненне найвышэйшых вынікаў па вытворчасці зерневых і зернебабовых культур, алейнага насення рапсу, бульбы, рэалізацыі жывёлы — СВК «Ляхавіцкі» (старшыня Аляксандр Вітко), вытворчасці цукровых буракоў і рэалізацыі малака — СВК «Шлях новы» (старшыня Аляксандр Вашчук). Дарэчы, менавіта Аляксандр Вітко і Аляксандр Вашчук сёлета прызнаны лепшымі кіраўнікамі сельгасарганізацый.

З заслужанымі ўзнагародамі працаўнікоў АПК віншаваў старшыня райсавета Яўгеній Юрлевіч.

З прывітальным словам да ўдзельнікаў святкавання звярнуўся старшыня раённага выканаўчага камітэта Дзмітрый Бурдук. Кіраўнік раёна з гонарам расказаў пра сёлетнія здабыткі ляхавіцкіх аграрыяў, чые воля і высокае прафесійнае майстэрства дазволілі дасягнуць добрых паказчыкаў у розных галінах сельгасвытворчасці. Кіраўнік раёна ўручыў Ганаровыя граматы і Падзячныя пісьмы райвыканкама вясковым рупліўцам.
Апладысментамі віталі кіраўнікоў сельскагаспадарчых і перапрацоўчых прадпрыемстваў. Бо, як вядома, у агульным поспеху немалая іх заслуга.
Асаблівая ўвага, клопат і ўдзячнасць — шаноўным ветэранам сельгасвытворчасці. Іх вопыт — бясцэннае багацце, якім неабходна дзяліцца з наступнымі пакаленнямі. Гэта яны ў розныя гады закладвалі трывалы фундамент для развіцця аграпрамысловага комплексу Ляхавіччыны і падрыхтавалі дастойную змену.
На сцэну запрашаліся пераможцы традыцыйнага раённага спаборніцтва. На сёлетнім жніве, як і на нарыхтоўцы травяністых кармоў, роўных не было СВК «Дарава» (старшыня Уладзімір Пятроўскі) і па ІІ групе гаспадарак ААТ «Ляхавіцкі райаграсэрвіс» (дырэктар Дзмітрый Несцяровіч). У вырошчванні льну першынство за ААТ «Ляхавіцкі льнозавод» (дырэктар Дзмітрый Скакун). Лепш за іншых спрацавалі бульбаводы СВК «Жарабковічы» (старшыня Віталій Бусько) — у іх дыплом І ступені. Узнагарода такога ж узроўню і ў СВК «Шлях новы» (старшыня Аляксандр Вашчук), які дабіўся лепшых паказчыкаў у вытворчасці цукровых буракоў. Сёлетні пераможца ў вытворчасці і продажы мяса — СВК «Ляхавіцкі» (старшыня Аляксандр Вітко). Лепшай фермерскай гаспадаркай прызнана «Даманская» (кіраўнік Іван Шклянік). Пад заслужаныя апладысменты паднімаліся на сцэну героі жніва, перадавікі, чые прозвішчы сёлета заносіліся на Дошку гонару. Падарункі і грашовыя прэміі ім уручыў Дзмітрый Бурдук. Героі-пераможцы раённага спаборніцтва — экіпажы зернеўборачных камбайнаў у складзе Канстанціна і Андрэя Дзянішчыкаў з СВК «Жарабковічы», Дзмітрыя і Рыгора Арлоўскіх з ААТ «Ляхавіцкі райаграсэрвіс», маладзёжныя экіпажы Мікалая Лапіча і Аляксандра Салодкага з СВК «Ліпнянка», Руслана Бута з СВК «Шлях новы». На ўборцы кукурузы лепшым стаў экіпаж у складзе Аляксандра Юніка і Сяргея Казакевіча з СВК «Ляхавіцкі». Адзначаны і сёлетні пераможны фініш вадзіцеля СВК «Жарабковічы» Эдуарда Пірштука, яго калегі Вячаслава Русакевіча з ААТ «Ляхавіцкі райаграсэрвіс», маладых вадзіцеляў Андрэя Жэркі з СВК «Ляхавіцкі» і Артура Гутырчыка з СВК «Востраў-Агра».

Пераходныя Ганаровыя сцягі сёлета дасталіся СВК «Шлях новы» і «Ляхавіцкі».

Сярод машыністаў зернетакоў першае раённае месца ў брыгады з СВК «Шлях новы». Мікалай Курловіч з райаграсэрвісу і Міхаіл Міклашэвіч з СВК «Ордэна «Знак Пашаны» Кастрычнік» — лепшыя сярод камбайнераў кормаўборачных камбайнаў. Выдатна справіліся з пастаўленай задачай — без страт адвезці кармы ад кормаўборачных камбайнаў — Аляксандр Маслаў з СВК «Шлях новы» і Аляксандр Папко з райаграсэрвісу. Сярод буракаўборачных камбайнаў лепшым стаў экіпаж Андрэя Юруця з райаграсэрвісу. Пераможцам сярод камбайнераў ільноўборачных камбайнаў прызнаны Уладзімір Маслоўскі, які працуе на льнозаводзе. Віталі ўдзельнікі свята і лепшых у раёне жывёлаводаў: сярод аператараў машыннага даення — звяно ў складзе Зоі Сецько і Вольгі Грыкель з СВК «Ляхавіцкі» і Марыю Турко з СВК «Ордэна «Знак Пашаны» Кастрычнік». Сярод аператараў па адкорме буйной рагатай жывёлы роўных няма працаўніцы СВК «Ляхавіцкі» Таццяне Кендыш, сярод аператараў па вырошчванні маладняку — Валянціне Свістуновіч з СВК «Шлях новы», сярод аператараў па вырошчванні і адкорме свіней — Ганне Ягнешка з ЗТАА «БелДан», па вырошчванні парасят — таксама працаўніку гэтага прадпрыемства Віталію Мінцэвічу.
Шмат шчырых слоў у адрас працаўнікоў сельскай гаспадаркі і перапрацоўчай прамысловасці сказаў старшыня раённага Савета дэпутатаў Яўгеній Юрлевіч. Кіраўнік дэпутацкага корпуса ўручыў Ганаровыя граматы і Падзячныя пісьмы райсавета.
Намеснік старшыні райвыканкама, начальнік райсельгасхарчу Мікалай Варажун павіншаваў калег з прафесійным святам і ўручыў падарункі і грашовыя прэміі ўладальнікам другіх і трэціх месцаў у раённым спаборніцтве.
Не спыняюцца на дасягнутым, смела ідуць наперад, б’юць раней устаноўленыя рэкорды працавітыя землякі. Гучнымі апладысментамі сустракала зала заслужаных уладальнікаў ганаровага звання «Лепшы па прафесіі» (іх прозвішчы будуць надрукаваны ў бліжэйшых нумарах «ЛВ»).
Віншавалі, уручалі граматы, падарункі лепшым з лепшых старшыня райкама прафсаюза работнікаў АПК Мікалай Вайцешык, дырэктар Ляхавіцкага філіяла абласнога аграпрамысловага саюза Уладзімір Пятроўскі. На свяце было нямала іншых незабыўных, хвалюючых момантаў.

Спецыяльны прыз «ЛВ» — даўняя добрая традыцыя.

Па добрай традыцыі пяты год запар спецыяльны прыз газеты «Ляхавіцкі веснік» знаходзіць свайго ўладальніка, дакладней, уладальніцу. Сёлета галоўны рэдактар раёнкі Вольга Барадзіна ўручыла падарунак, дыплом «ЛВ», кветкі, а таксама падпіску на раённую газету на I квартал 2013 года аператару машыннага даення СВК «Шлях новы», вельмі шчырай і працавітай жанчыне Ірыне Масцілоўскай — маці траіх дзяцей.
Намеснік старшыні райвыканкама Святлана Юрлевіч абвясціла пераможцаў конкурсу караваяў: 1 месца — у СВК «Ляхавіцкі», на 2 і 3 месцах, адпаведна, ЗТАА «БелДан» і СВК «Шлях новы». Адзначаны былі і самыя актыўныя удзельнікі выставы сельгаспрадукцыі.
Сёлетняе свята было надзвычай цікавым. Як заўсёды, настрой на ім стваралі лепшыя ўдзельнікі мастацкай самадзейнасці раёна.
Галіна КАНЬКО.
Фота Сяргея ВАРАНОВІЧА.