Пад знакам энергіі

19/12/2017 734 redakcyja 0 Comment

22 снежня 2003 года ў прафесійнае свята – Дзень энергетыка – у Ляхавічах па адрасе: Энергетыкаў, 3 пачало адлік сваёй працоўнай біяграфіі таварыства з абмежаванай адказнасцю «Трансэлектракамплект». Сёння прадпрыемства выпускае больш як 200 найменняў электратэхнічнай прадукцыі.
Яе запатрабаванасць на айчынным і замежным рынках стабільна высокая: пакупнікі даюць зялёнае святло муфтам і іх камплектуючым, зробленым у «Трансэлектракамплекце». Прадпрыемства нарошчвае абароты, знаходзіць новыя адрасы збыту. Працаваць на склад – гэта не пра ТАА.

– Сакрэт вытворчага поспеху просты: мы выпускаем якасную, бяспечную і ў чымсьці нават эксклюзіўную прадукцыю. Наладзілі цесныя стасункі са спажыўцамі. Наш першы, галоўны і надзейны партнёр, дылер у Расіі – фірма «НеваТрансКомплект». Заключылі дамоўленасці на пастаўку муфтаў ва Украіну, электракамплектуючых – у Казахстан. Атрыманая дэкларацыя адпаведнасці на аснове
тэхнічнага рэгламенту Мытнага саюза пацвярджае канкурэнтаздольнасць і якасць нашай прадукцыі. Рост аб’ёмаў вытворчасці і асартыменту прадукцыі, асабліва інавацыйнай – адна з першачарговых задач сёння і на перспектыву, – расказвае заснавальнік і дырэктар ТАА Генадзій Сакуць.
У аснове вытворчай палітыкі прадпрыемства – прафесіяналізм кожнага на працоўным месцы і дастойная аплата за высокапрадукцыйную работу. Адна з вызначальных рыс прадпрыемства – надзейная дзелавая рэпутацыя і давер партнёраў. Падтрымаць апошняе заклікана і ўкараненне ў ТАА сістэмы менеджменту якасці СТБ ISO 9001-2009. Дарэчы, з дня на дзень у таварыстве чакаюць прадстаўнікоў фірмы, якая штогод праводзіць аўдыт на адпаведнасць патрабаванням сістэмы менеджменту.
На «Трансэлектракамплекце» заўжды клапоцяцца пра павышэнне кваліфікацыі работнікаў: вучоба і перанавучанне, курсы і стажыроўкі – працэс пастаянны.
– Планаў, мар нямала. Пашырэнне асартыменту патрабуе новага абсталявання. З’явяцца свабодныя фінансы, будзем яго набываць. Новая прадукцыя – дадатковыя рынкі збыту. Вывучаем вопыт іншых, аналізуем. Пралічваем усе за і супраць наконт выпуску гаспадарчых рэчаў з адходаў поліэтылену, – расказвае намеснік дырэктара Яўгеній Сяргей.
Тэрыторыя прадпрыемства добраўпарадкаваная, дагледжаная. Удала ўпісалася ў агульную карціну новабудоўля ў васільковым колеры – вытворчы цэх. Праведзены ўсе неабходныя камунікацыі, зараз брыгада пад кіраўніцтвам галоўнага інжынера Аляксандра Гаспадуры вядзе электрамантажныя работы. Набыта і частка абсталявання.
– З нецярпеннем чакаем запуску новага цэха, дзе будуць створаны яшчэ лепшыя ўмовы для працы. Прыемна, што дырэктар клапоціцца пра гэта. Я ў «Трансэлектракамплекце» з моманту заснавання і ні разу не пашкадавала, што прыйшла сюды. Тут умеюць цаніць чалавека, – гаворыць, адна са старэйшых работніц ТАА камплектоўшчыца Галіна Сокал.
Галіну Аляксандраўну падтрымлівае вопытны электрык Аляксандр Мысла:
– Задавальняюць і графік, і ўмовы працы, і заработная плата. Пра нашы правы клапоціцца прафсаюз.
14 гадоў – стаж работы ў таварыстве камплектоўшчыка Валерыя Гнідзіна, вадзіцеля Уладзіміра Максіменкі, вядучага эканаміста Юрыя Палуянчыка, галоўнага бухгалтара Ганны Бецька.
Багаты «Трансэлектракамплект» і на сямейныя дынастыі. Анатолій Максімчык – наладчык, яго сын Яўгеній – апрацоўшчык вырабаў; Васілій Жмурко – токар, жонка Галіна – камплектоўшчыца; Леанід Юнік – вадзіцель, дачка Таццяна – інжынер; Віталій Татарыновіч – майстар участка, а брат Аляксандр – аплётчык. Наталля Брэзіна працуе бухгалтарам, сын Рыгор – апрацоўшчыкам вырабаў з пластмасы, як і браты Аляксандр і Міхаіл Македановічы; Анатолій Кошман – токарам, яго сястра Ірына – камплектоўшчыцай.
Адно з падраздзяленняў прадпрыемства, можна сказаць няпрофільнае, але таксама запатрабаванае – магазін «Юбілейны». Гэта гандлёвая кропка – сапраўдная палачка-выручалачка і для тутэйшых работнікаў, і для жыхароў мікрараёна. У магазіне можна купіць усе неабходныя прадукты. Разнастайны асартымент, ветлівае абслугоўванне, даступныя цэны – пакупнікоў хапае, магазін прыбытковы. Як і само таварыства.
– На маю думку, беражлівасць, рост прадукцыйнасці, адказнасць кожнага за свой участак работы, падмацаваныя належнай дысцыплінай, – залог паспяховасці ўсяго прадпрыемства. Калектыў такую тактыку разумее і падтрымлівае, – зазначае Генадзій Сакуць.

Галіна КАНЬКО.
Фота Сяргея ВАРАНОВІЧА.

Паважаныя працаўнікі «Трансэлектракамплекта», шаноўныя ветэраны!
Шчыра віншуем з прафесійным святам – Днём энергетыка. Няхай у вашым жыцці будуць толькі прыемныя падзеі, кожны дзень напаўняецца шчасцем і радасцю, побач будуць любячыя людзі і надзейныя сябры, здароўе не падводзіць, а натхненне прыходзіць.
Дырэкцыя і прафкам ТАА «Трансэлектракамплект».