Колас паспеў. Гаспадаркі Ляхавіцкага раёна выйшлі на ўборку збожжавых

Жніўны дэбют на хлебных палетках раёна адбыўся роўна тыдзень назад. Прыйшоўся акурат на выхадныя дні, калі абсалютная большасць з нас адпачывала. Але гэта не пра працаўнікоў сельскагаспадарчай нівы, для якіх наступілі адказныя і напружаныя працоўныя будні. Збожжаўборачныя камбайны вывелі на поле пакуль толькі ў ДП «Нача» і ЗАТ «Белпрампрыбор» – менавіта тут вырошчвалі азімы ячмень.
Ужо і ўбралі: «Нача» на кожным з 26 сваіх гектараў атрымала каля паўсотні цэнтнераў зерня. «Белпрампрыбораўскія» пасевы на старце складалі крыху больш за 80 гектараў, кожны з якіх урадзіў у сярэднім на 40 цэнтнераў.
Ураджай нядрэнны, што пацвердзіў адзін з раённых першапраходцаў жніва-2019 старшы камбайнер з «Белпрампрыбора» Аляксандр Дубіна – механізатар з больш як дваццацігадовай хлебаробскай практыкай. Камбайн у Аляксандра Канстанцінавіча хоць і не новы, але для сваіх «сямі плюс» палявых сезонаў выглядае досыць рэспектабельна, «размаўляе» роўна.
– Перад сезонам усё перагледзеў: што падлягала замене – заменена. З запаснымі часткамі і расходнікамі вострых сітуацый не ўзнікала. Дакладныя дарэгуліроўкі выконваліся ўжо непасрэдна ў полі. Кожная раніца пачынаецца з абслугоўвання тэхнікі, – тлумачыць камбайнер.
А за ячменем азімым паспеў яравы. Ужо 4 ліпеня можна было назіраць за работай збожжаўборачнага камбайна на палетках ААТ «Ляхавіцкі льнозавод».

Іван КАВАЛЕНКА.
Фота аўтара.