В Ляховичском районе подведены итоги и состоялось награждение победителей круглогодичной районной спартакиады трудовых коллективов
Са свайго роду комплексным марафонам можна параўнаць нашу спартакіяду. Чаму не, калі старты праходзяць фактычна на працягу ўсяго каляндарнага года, а кожны яго адрэзак ”спецыялізаваны” па відах і спартыўных дысцыплінах. Каб прайсці гэты марафон роўна і без рэзкіх падзенняў, каманда павінна знаходзіцца ў тонусе і ў зборы са студзеня па снежань. Што няпроста, безумоўна, з улікам прафесійнай занятасці работнікаў прадпрыемстваў, арганізацый, устаноў.
Важным складальнікам паспяховага спартакіяднага выступлення з’яўляецца і наяўнасць у камандзе рознабакова падрыхтаваных фізкультурнікаў — так бы мовіць, універсальных салдат спорту, хто б мог на аматарскім моцным узроўні выступіць па нейкай з дысцыплін як летняга, так зімовага этапаў спартакіяды. Апошні, напрыклад, уключае ў сябе лыжную эстафету, індывідуальную лыжную гонку, імправізаваны біятлон, сямейную эстафету, барацьбу на руках, більярд, шахматы. Этап летні не менш разнастайны і такі ж насычаны. Да ўсяго пералічанага, у рамках спартакіяды праходзіць турыстычны злёт, спаборніцтвы па міні-футболе, валейболе. Найменшая сума месцаў па выніках кожнага асобнага выступлення і гарантуе перамогу ў генеральнай спартакіяднай класіфікацыі. У 2012 годзе такога поспеху дасягнула каманда СВК «Жарабковічы». Як заўважыў падчас узнагароджання галоўны суддзя спаборніцтваў дырэктар фізкультурна-спартыўнага клуба «Колас» Генадзій Новік, перамаглі за яўнай перавагай і ў многім дзякуючы ўмелай арганізацыі ў гаспадарцы фізкультурна-масавай і спартыўнай работы. «Жарабковічы», дарэчы, сталі адзіным сельскагаспадарчым прадпрыемствам раёна, чыя каманда прайшла спартакіядны марафон ад пачатку да канца. Прадстаўнікі гаспадаркі выступалі абсалютна ў кожнай з дысцыплін праграмы і ні ў адной з іх, як сведчаць пратаколы, не апускаліся ніжэй трэцяга месца.
На другое месца прабіліся спартсмены КУМВП ЖКГ «Ляхавіцкая ЖКГ», трэцімі сталі прадстаўнікі УАЗ «Ляхавіцкая ЦРБ».
У параўнанні з папярэдняй, спартакіяда-2012 засведчыла, на жаль, заметна меншую ўдзельніцкую актыўнасць. Па словах Генадзія Новіка, было 16 каманд- удзельніц замест 30-ці ў 2011 годзе.
А ўжо 24 лютага стартуе чарговая — 2013 года — раённая спартакіяда працоўных калектываў. Месца правядзення — стадыён гарадскога спарткомплексу «Колас». Куды і запрашаем за здароўем.
Іван КАВАЛЕНКА.