У Ляхавічах дзіцячае свавольства з агнём стала прычынай пажару
26 лютага ў 14 гадзін у РАНС паступіў тэлефонны званок ад ляхавічанкі 2011 г.н. Дзяўчынка паведаміла, што ў іх кватэры шматпавярховага дома, дзе яна знаходзіцца разам з братам, успыхнуў пажар. Дарослых у памяшканні ў той момант не было — гаспадыня як раз ненадоўга адлучылася ў магазін.
Калі выратавальнікі прыбылі на месца здарэння, дзяцей з кватэры ўжо вывеў сусед. Ён на сваім балконе паверхам вышэй убачыў дым і адразу паспяшаўся на дапамогу: спрабаваў тушыць агонь самастойна, але той хутка распаўсюджваўся.
Выратавальнікі аператыўна справіліся з пажарам. Дзеці 2011 г.н. і 2014 г.н. не пацярпелі. У выніку здарэння пашкоджаны балконныя дзверы і рама, дыван, закураны сцены і столь. Прычына ўзгарання высвятляецца. Разглядваецца версія — дзіцячае свавольства з агнём.
Каб агонь не стаў прычынай бяды, бацькам варта захоўваць запалкі ў месцы, недаступным для дзяцей. У выпадку пажару, тэлефануйце па нумарах 101 ці 112.
Кірыл КРАСОЎСКІ, намеснік начальніка РАНС.