Да Дня народнага адзінства ў Ляхавіцкім ТЦСАН адбылася сустрэча пакаленняў
Да Дня народнага адзінства ў Ляхавіцкім тэрытарыяльным цэнтры сацыяльнага абслугоўвання насельніцтва адбылася цёплая сустрэча пакаленняў — круглы стол пад назвай «Розныя сябры»
Сустрэча сабрала разам людзей залатога ўзросту (наведвальнікаў аддзялення комплекснай падтрымкі ў крызіснай сітуацыі і дзённага знаходжання для грамадзян пажылога ўзросту ТЦСАН) і маладое пакаленне — вучняў Падлескай базавай школы, якія з’яўляюцца выхаванцамі бібліягуртка «Гарэзлікі» пры Падлескай сельскай бібліятэцы.
Такія сустрэчы ўжо сталі добрай традыцыяй, якая аб’ядноўвае розныя пакаленні.
Падчас круглага стала пажылыя людзі падзяліліся ўспамінамі пра свой працоўны шлях, паказалі кранальныя фотаздымкі з асабістых архіваў і далі дзецям каштоўны напамін: кожны грамадзянін павінен прыносіць карысць сваёй краіне і актыўна ўдзельнічаць у грамадскім жыцці.
Юныя ўдзельнікі гуртка «Гарэзлікі» парадавалі старэйшых сяброў творчымі нумарамі. Яны падрыхтавалі танцы часоў юнацтва сённяшніх пенсіянераў і пранікнёна прачыталі вершы, прысвечаныя важнасці гістарычнай даты — 17 верасня. Сустрэча пакінула шмат цёплых эмоцый і яшчэ раз даказала, што адзінства пачынаецца з павагі і сувязі паміж пакаленнямі.
