Творчая зорка Алены
На навагодні ранішнік, быццам ураган, урываецца вельмі абаяльная казачная Баба Яга і адразу становіцца ўсеагульнай любіміцай, з якой дзеці з задавальненнем гуляюць, спяваюць, адгадваюць загадкі. Роля гэтага папулярнага персанажа, як з гумарам адзначае сама Алена Макарэвіч і калегі – педагогі цэнтра дадатковай адукацыі дзяцей і моладзі, стала яе зорнай.
Талентаў у нашай зямлячкі шмат. Напрыклад, у дэкаратыўна-прыкладной творчасці Алена прафесіянал. І па стане душы, і па дыпломе інстытута культуры, дзе атрымала спецыяльнасць культуролага, выкладчыка культуралагічных дысцыплін і выяўленчага мастацтва. У яе руках за некалькі хвілін звычайная драўляная кухонная дошка ўпрыгожваецца сімвалам надыхо-дзячага года – чырвоным пеўнем. Арыгінальным узорам аздобліваецца карціна на тканіне. Разьба па дрэве, дызайн, фларыстыка, дэкор, макрамэ, бісерапляценне – ва ўсім гэтым раскрываецца талент.
Сваім майстэрствам Алена Макарэвіч шчодра дзеліцца з вучнямі, якія наведваюць аб’яднанні па інтарэсах “Батык” і “Юны дызайнер” ЦДАДіМ. Неаднаразовыя перамогі яе выхаванцаў у раённых, абласных, рэспубліканскіх конкурсах, удзел у выставах пацвярджаюць, што ў таленавітых педагогаў таленавітыя вучні. Пра кожнага са сваіх выхаванцаў Алена гатова расказваць бясконца:
–Прыходзіць дзяўчынка-першакласніца, нічога не ўмее, але відаць, што ёй вельмі падабаецца маляваць. Ловіць кожнае слова, кожны рух… Твар дзіцяці свеціцца, калі атрымалася першая карціна. Іх потым будзе шмат, але першая – асаблівая радасць.
За два дзесяцігоддзі работы ў цэнтры дадатковай адукацыі Алена Макарэвіч атрымала нямала ўзнагарод, сёлета ўдастоена ганаровага звання “Чалавек года”.
Галіна КАНЬКО.
Фота Сяргея ВАРАНОВІЧА.