І зноў ПМС
Каторы год запар па ініцыятыве аддзела па справах моладзі райвыканкама праводзіцца конкурс на лепшы савет моладзі (іх на Ляхавіч-чыне – 30).
Сёлета ў фінал выйшлі маладзёжныя саветы КУМВП ЖКГ “Ляхавіцкая ЖКГ”, прадпрыемства меліярацыйных сістэм, раённага вузла паштовай сувязі, райпо, Ляхавіцкага дзяржаўнага аграрнага каледжа, СВК “Ордэна ”Знак Пашаны” Кастрычнік” і “Жарабковічы”.
Журы ацэньвала розныя бакі дзейнасці саветаў моладзі. Распрацоўкі праектаў і мерапрыемстваў, што праводзіліся сёлета, творчыя справаздачы, аформленыя ў выглядзе стэндаў, буклетаў, фота-і відэапрэзентацый, актыўнае грамадскае жыццё саветаў і многае іншае ўлічвалася пры вызначэнні пераможцы.
Сёлета пасля двухгадовага перапынку ў конкурсе лепшым прызнаны маладзёжны савет ПМС (старшыня Сяргей Юшкевіч). Асноўныя накірункідзейнасці савета-пераможцы – спартыўна-масавы і культурна-забаўляльны. Моладзь прадпрыемства паспяхова выступала на спартыўным свяце “Ляхавіцкая лыжня”, традыцыйным турніры па валейболе, а на нядаўна прайшоўшых спаборніцтвах “Вертыкаль” Сяргей Юшкевіч заняў 1 месца ў дартсе. Клапоцяцца маладыя пээмэсаўцы і пра свайго падшэфнага – ветэрана Вялікай Айчыннай вайны Івана Іванавіча Шастака з вёскі Стараселле. Традыцыйнымі сталі арганізаваныя паездкі на хакейныя матчы клуба “Дынама”, у Жыровіцкі манастыр.
Маладзёжны савет прадпрыемства клапоціцца і пра ўмовы работы. У калектыўным дагаворы маладым рабочым, выпускнікам прафесійна-тэхнічных вучылішчаў і сярэдніх школ зніжаны нормы выпрацоўкі на 10 працэнтаў на працягу 6 месяцаў без змяншэння заработнай платы. Членам добраахвотнай народнай дружыны (яна створана пры прадпрыемстве і дзейнічае не на словах, а на справе) даецца дадатковы водпуск за 10 і больш дзяжурстваў.
Бясспрэчна, поспех работы савета моладзі ў многім залежыць ад падтрымкі кіраўніцтва арганізацыі ці прадпрыемства, лідарскіх якасцей старшыні савета і ўзаемадзеяння з іншымі структурнымі падраздзяленнямі.
Савет моладзі ПМС на пачатку лістапада прыме ўдзел у абласным конкурсе “Лепшы савет моладзі Брэстчыны”.
Алег ТРАЦЦЯК,
начальнік аддзела па справах
моладзі райвыканкама