У прыгожай абгортцы
І гэта зусім не той выпадак, калі за прыгожай абгорткай хаваецца нешта малавартаснае. Наадварот – пад бліскучым поліэтыленам герметычна запакавана каштоўная субстанцыя. Сянаж у такім выкананні, пра што сведчаць і практыка, і спецыялісты гэтага сельскагаспадарчага цэха, адрозніваецца высокай якасцю. У тым выпадку, вядома, калі дакладна, пакрокава пройдзены ўсе этапы тэхналагічнага ланцужка. Касьба як трэба, работа варушылак, час на падсушку і г.д. А аб’ёмныя цыліндрычнай формы шпулі з’яўляюцца ўжо канчатковым прадуктам, на якім фарміруецца прадукцыйнасць жывёлагадоўчай фермы.
Увогуле, спосаб не новы, але па-ранейшаму адносіцца да ліку сучасных. Практыкуюць яго дастаткова даўно і многія сельскагаспадарчыя прадпрыемствы нашага раёна. Як адзін з метадаў назапашвання кармоў, паралельна ці ў дадатак да класікі жанру – нарыхтоўка сенажу ў траншэю.
ЗАТ “Белпрампрыбор” не з іх ліку. У адзін з гарачых касавічных дзён мы пабывалі на зялёным палетку акцыянернага таварыства. Паглядзелі, пагутарылі з механізатарамі, пранікліся. Галоўны аграном прадпрыемства Віктар Канецпольскі на тэму ўраджайнасці зялёнай нівы гаворыць “вяла”, з адценнем суму ў голасе. Але канкрэтна:
– Травы ў гэтым годзе ці не на палову горшыя леташніх. Пра прычыны ведаеце і паўтарацца на тэму “адсутнасці вясны” не буду. Працуем. Качаем у рулоны, абгортваем, складваем. Усё гэта практычна ў рэжыме нон-стоп. Невялікія перапынкі ў рабоце апошнім часам здараюцца. Але, калі гаварыць у цэлым, надвор’е спрыяе корманарыхтоўчым клопатам. Хоць ёсць і адваротны бок медаля: зерневыя і іншыя расліны пакутуюць ад смагі.
Прыкладна палову наяўных шматгадовых травяных угоддзяў прадпрыемства ўжо скасіла, многае ўбрана. А касавіца працягваецца, і “рухаюць” яе вопытныя, не першы дзень “у тэме” трактарысты-машыністы-вадзіцелі. Першым з зялёным палеткам вітаецца Аляксандр Дубіна. Звычайна гэта адбываецца глыбокай раніцай. Ён касільшчык з многагадовым вопытам і імкненнем зрабіць сваю справу максімальна якасна. Прэсам падборшчыкам-абмотчыкам кіруе Іван Дзянішчык. Усе прыведзеныя ў папярэднім выпадку эпітэты будуць справядлівы і ў яго адрас.
Віталій Саган па-майстэрску падпарадкоўвае сваёй волі пагрузчык “Амкадор”, абсталяваны спецыяльным неагрэсіўным пагрузачным захватам. Неагрэсіўнымі, далікатнымі, дакладнымі і выверанымі павінны быць і дзеянні машыніста пагрузчыка. Каб не сапсаваць поліэтыленавую “скурку”. Калі такое здарэнне не будзе заўважана і своечасова выпраўлена – пагаршэнне якасных характарыстык прадукту гарантавана.
На маршруце “касавічнае поле – месца складзіравання” ў ЗАТ “Белпрампрыбор” задзейнічаны ў тым ліку і платформенны МАЗ. Аляксею Кулаку, канешне, бывае няпроста за рулём вялікага аўтамабіля.
– Добры хлопец, працуе даўно, – коратка і без вытанчаных слоў ахарактарызаваў аўтамабіліста галоўны аграном.
Дабавім, што пералічаным складам удзельнікаў зялёнае жніво ў “Белпрампрыборы”, безумоўна, не абмяжоўваецца. Кампанія агульнагаспадарчая, усебакова важная і ўсезначная. Скажам інакш: важная і значная для кожнага працаўніка акцыянернага таварыства.
Па даных на ўчарашні дзень, у раёне скошана тры чвэрці шматгадовых травяных угоддзяў. Нарыхтавана амаль 23 тысячы тон сенажу.
Іван КАВАЛЕНКА.
Фота Сяргея ВАРАНОВІЧА.
Механізатар Васілій Равяка, вадзіцель Аляксей Кулак, механізатар Віталій Саган
Механізатар Іван Дзянішчык
