Пяты корпус кропка бай. Як адпачываюць у Ляхавіцкай «Чайцы»
Кіламетр, другі ад райцэнтра, паварот – і вось такая знаёмая дарога, паабапал якой спачатку жытнёвае поле з валошкамі, потым невялікі лясок з водарам паспяваючых суніц і, зрэшты, любімы ляхавіцкай дзятвой летнік. Прывітанне, “Чайка”!
16 чэрвеня адбыўся заезд на другую змену. Навасельцы – 102 хлопчыкі і дзяўчынкі ва ўзросце ад 7 да 16 гадоў з розных школ горада і раёна. Новыя знаёмствы, чарговыя прыгоды, мноства і толькі прыемных сюрпрызаў, конкурсы, гульні, падарожжы, дыскатэкі – такой абяцае быць гэта змена даўжынёй у 18 дзён. І кожны з іх будзе не звычайным забаўляльным, а з эканамічным ухілам. Уся змена называецца “Фартуна”, замест атрадаў створаны пяць філіялаў з адпаведнымі назвамі “Банкіры”, “Капітал”, “Манаполія”, “Фінансісты”, “Эканамісты”. Ініцыятар праекта, старшы выхавальнік Аляксандр Стэцко раскрывае некаторыя асаблівасці запланаванага і задуманага:
– Адпачынак павінен быць не толькі аздараўленчым, але запамінальным і навучальным. Праз гульню разам з калегамі-педагогамі вучым рабят быць крышачку эканамістамі. Замест традыцыйнага фестывалю творчасці пройдзе форум мастацтваў “Па-за канкурэнцыяй”. “Міс лагера” і “Містар лагера” заменяць “Бізнес ледзі” і “Бізнес бой”. І валюта ў нас свая – называецца “леты”.
Час у летніку бяжыць імкліва. Пад’ём, зарадка, сняданак і пайшло-паехала, толькі паспявай – адпачывай!
– Сумаваць няма калі. Я ў летніку першы раз. Трапіў у філіял “Манаполія”. Шкадую, што раней не прыязджаў. Але нічога, наступным летам зноў сюды. Адразу столькі сяброў знайшоў, – расказвае 12-гадовы Павел Гачко з аграгарадка Ліпск.
– А я ў “Чайцы” пяты раз. Як жа тут цудоўна і весела. У нас філіял “Банкіры”. Стане сумна, дайце знаць. Электронны адрас просты: “Пяты корпус кропка бай”, – далучаецца да размовы Каця Коктыш з Баранавічаў.
– Педагогі на змене актыўныя. Ёсць вопытныя, як Таццяна Калацкая і Таццяна Нагорная, яны, нібы мамы для адпачываючых. Ёсць і маладыя – студэнты, якія таксама хутка знайшлі з хлопчыкамі і дзяўчынкамі агульную мову. Здароўе рабят пад надзейным кантролем медыкаў з Ліпскай урачэбнай амбулаторыі – урача Юліі Лапко і медсястры Наталлі Гачко. А шэф-повар у нас – мастак-кулінар Святлана Вайшэвіч, – расказвае дырэктар лагера Людміла Лешык.
Вось такое паўсядзённа-святочнае жыццё на другой чайкаўскай змене, адкрыццё якой урачыстай лінейкай і вялікай канцэртнай праграмай адбылося ў мінулы панядзелак.
Галіна КАНЬКО.
Фота Сяргея ВАРАНОВІЧА.