«Берагінін» абярэг. Ляхавіцкі строй

Не толькі непараўнальна прыгожае народнае ўбранне з тутэйшым каларытам, не толькі непаўторна меладычныя песні і грацыёзныя танцы, якія, здаецца, насычаны мясцовай самабытнасцю, а ўвесь лад жыцця, размераны і правераны часам, уваходзіць у паняцце Ляхавіцкага строю. Уваходзіць разам з русакосымі дзяўчатамі і вясёлымі, майстравымі хлопцамі. Разам з душэўнай шчодрасцю і нястомнай працавітасцю, уменнем ствараць і прыгожае, і надзённае. З бясконцымі талентамі і шчырай любоўю да сваёй зямлі. А любоў сілкуецца ад гэтай зямлі, а зямля поўніцца, квітнее гэтай любоўю. Такое вось шчаслівае жыццёвае кола. Бы дзве вясёлкі злучыліся, і яно, кола, атрымалася такім яркім, такім адметным, бы валошкі з рамонкамі ў полі, бы шыпшыны ружовыя пялёсткі, бы адценне квітнеючай ліпы і ў сонечных фарбах жытнёвае поле. Паглядзіце на вышыванкі, дзе крыжыкам ці гладдзю – уся гэта прыгажосць. А ляхавіцкай моды андарак, без сумнення, уразіў бы самыя прыдзірлівыя подыумы замежжа, як і ручнікі, коўдры, дзяружкі, сурвэткі. Завітайце ў вёску, дзе і стары, і малы шануе роднае народнае і клапоціцца пра тое, каб яно найдаражэйшай спадчынай перайшло наступным пакаленням, як перайшло нам, сённяшнім, ад продкаў.
Захапленне, шанаванне, мудрая любоў да народных звычаяў і абрадаў – у абмене рэчываў многіх культработнікаў і ўстаноў культуры. Сярод такіх – яркая і непаўторная народная эксперыментальная вакальная група «Берагіня» Дараўскага СДК. І групу, і дом культуры ўзначальвае Вольга Цімашок, а ўсяго ў склад «Берагіні» ўваходзіць дзевяць чалавек. Колькі радасці дораць яны землякам сваёй творчасцю! А сумесна з не менш таленавітымі работнікамі мясцовага Дома рамёстваў не проста выклікаюць інтарэс да народнай культуры, спрадвечных уменняў, але і маюць намер аднавіць з забыцця даўнія вясковыя завядзёнкі і абрады. «Берагіня» збірае матэрыял для тэатралізаванай пастаноўкі дараўскага вясельнага абраду, з якога ў даўнія часы продкі пачыналі сваё сямейнае жыццё. А пакуль самадзейныя артысты згадзіліся на «родна-народную» фотасесію. І «Берагінін» абярэг ад забыцця, на карысць шанавання народных звычаяў прапануем чытачам «ЛВ». Прыгожы абярэг, пераканаўчая «агітка»: гэта – наша, беларускае!
Вольга БАРАДЗІНА.
Фота Маргарыты КУХТА.

One thought on “«Берагінін» абярэг. Ляхавіцкі строй

  • 03/07/2018 в 14:29
    Permalink

    Дзяўчаты з «Берагіні» вялікія малайчынкі! Сапраўды, гэта адзін з лепшых калектываў Ляхавіцкага раёна!

Добавить комментарий

Ваш e-mail не будет опубликован. Обязательные поля помечены *