Для Ляхавіцкага раённага вузла электрычнай сувязі інфарматызацыя была і застаецца адным з галоўных і прыярытэтных накірункаў развіцця
У традыцыйным Пасланні беларускаму народу і Нацыянальнаму сходу Прэзідэнт нашай краіны сярод трох нацыянальных праектаў для абнаўлення Беларусі назваў і інфарматызацыю грамадства.
Для раённага вузла электрычнай сувязі як аднаго з падраздзяленняў Белтэлекама, інфарматызацыя была і застаецца адным з галоўных і прыярытэтных накірункаў развіцця. Можна бясконца пералічваць новыя віды паслуг, якія дазваляюць больш поўна задавольваць патрэбы людзей, пазбаўляюць валакіты, бюракратызму. Адна з апошніх і запатрабаваных — аб’яднанне разрозненых тэрытарыяльных вузлоў у адзіную інфармацыйную прастору пры дапамозе карпаратыўнай сеткі VPN. Яна з поспехам выкарыстоўваецца ў райвыканкаме, сельвыканкамах, РАНС, РУПС, упраўленні па працы, занятасці і сацыяльнай абароне райвыканкама, фондзе сацыяльнай абароны, ашчадных банках. У бліжэйшы час да яе далучыцца цэнтральная раённая бальніца. Пасля ўключэння райбальніцы ў Брэсцкую абласную карпаратыўную сетку VPN любую інфармацыю паміж фельчарска-акушэрскім пунктам, ЦРБ і абласнымі структурамі аховы здароўя можна будзе аператыўна (у межах 30 секунд) перадаваць ад аднаго адрасата да другога.
Кожны, хто карыстаецца паслугай анлайн-аплаты, адчуў яе перавагі: хутка, зручна і не трэба стаяць у чэргах.
Яшчэ адзін інфарматызацыйны складальнік дэбюракратызацыі ў галіне электрасувязі — электронны дакументазварот з выкарыстаннем электроннага подпісу кіраўніка, што дазваляе значна скараціць паператворчасць і сэканоміць час. Кіраўнік ставіць электронны подпіс не на паперы, а на электронным носьбіце, і літаральна праз хвіліну патрэбны дакумент будзе, напрыклад, у галаўным офісе ў Брэсце. Аператыўнасць гарантавана.
У гэтым кантэксце нельга не ўзгадаць яшчэ адну паслугу 2G/3G, якая цяпер аказваецца Белтэлекамам сумесна з аператарам сотавай сувязі МТС. Яна дазваляе выкарыстоўваць шырокапалосны бесправадны доступ да інтэрнэту, незалежна нават ад таго, падключаны абанент да стацыянарнага тэлефона ці не.
Мікалай ЯЦУШКА,
спецыяліст па маркетынгу
РВЭС.