Чыя Мурка?.. «ЛВ» правёў чарговае апытанне
Нярэдкая карціна – бадзяжныя каты і сабакі. Хтосьці не ўтрымаецца, гледзячы ў жаласлівыя вочы, і дастане з сумкі што-небудзь з яды, іншыя заўсёды носяць з сабой “прыпасы на ўсякі выпадак”, каб пакарміць галодных жывёл. Ёсць і такія, каму ад гэтага ні холадна, ні горача. А іншыя не звяртаюць увагу на бяздомных істот, імкнуцца кінуць у іх чым-небудзь… Псіхолагі сцвярджаюць, што па адносінах чалавека да жывёлы можна вызначыць, наколькі ён здольны суперажываць чужому гору, схільны да дабрыні, дапамогі іншым.
Яшчэ летам у рэдакцыю патэлефанаваў жыхар адной з вёсак раёна з просьбай напісаць у газеце пра бадзяжных сабак, якія… прагналі з сотак, дзе пасаджана бульба, дзікоў. І супрацьлеглы прыклад: нямала выпадкаў, калі такія зграі палохаюць, нападаюць на людзей. Напрыклад, у Мінску сыну супрацоўніка рэдакцыі давялося праходзіць курс тэрапіі супраць шаленства: яго пакусаў сабака. Дарэчы, уладальнікі сабак якія парушаюць правілы іх выгулу, могуць быць прыцягнуты да адміністрацыйнай адказнасці. І ніякае “ён добры, не кусаецца” не дапаможа.
“Як вы адносіцеся да праблемы бадзяжных жывёл?”, — тэма чарговага апытання раёнкі.
Валянціна МАЛІХТАРОВІЧ, ляхавічанка:
— Я і “кашатніца” і “сабачніца” ў адной асобе. У мяне дома два сабакі і дзве кошкі. Адну з кошак падабрала на вуліцы. Душа не вытрымала, калі ўбачыла яе, бездапаможную: прынесла дамоў, вымыла, апрацавала ад блох і іншых паразітаў. Цяпер кошку не пазнаць, нават не скажаш, што ў яе было такое бязрадаснае мінулае. Звычайна, калі іду ў магазін ці па іншых справах, бяру з сабой што-небудзь з яды, каб пакарміць бяздомных жывёлін, калі ўбачу. Хаця неаднойчы чула ў свой адрас абурэнні жыльцоў аднаго са шматкватэрнікаў. Не разумею такіх людзей: Бог даў жыццё істоце, незалежна ад таго, чалавек гэта ці сабака, – значыць яна павінна жыць. А клопат пра ”братоў нашых меншых” – не ў цяжар.
Аляксей ЯНУШКЕВІЧ, студэнт:
—Заўсёды нейтральна адносіўся да ўсякіх там “вусатых-хвастатых”. Усё памянялася, калі ў сям’і маёй сястры з’явілася шчаня, якога пяцігадовая пляменніца назвала Рэксам. Цяпер ён цэнтр сусвету. Усё круціцца вакол яго: хоча гэта, любіць тое. Зразумела, жанчыны — асобы ўражлівыя, любяць кагосьці песціць, клапаціцца. Але на гэту любоў ”падселі” і мы са шваграм. Калі прыходжу да сястры ў госці, першай справай клічу Рэксіка, пагуляць з ім — адно задавальненне. Цяпер зусім па-іншаму адношуся і да бадзяжных жывёл, мне іх шкада. Нават з аднакурснікамі хадзілі ў прытулак для сабак, занеслі корм. Разам з тым лічу, што неабходна прымаць меры, каб бадзяжных жывёл было менш, і яшчэ да людзей, якія выкідваюць на вуліцу сваіх гадаванцаў.
Алена САЛАСЦЕЕВА, індывідуальны прадпрымальнік:
— Адназначна магу сказаць: мне іх вельмі шкада. Разумею, усім дапамагчы проста немагчыма, але імкнуся. У мяне дома два каты — звычайныя, беспародныя, але ў маёй сям’і іх любяць бязмежна. Разам са знаёмымі стараемся не толькі падкарміць бяздомных коцікаў, але і лечым іх, абараняем ад холаду. Для некаторых знайшлі і клапатлівых гаспадароў, якія не пабаяліся ўзяць іх да сябе ў дамы, і кватэры. Калі бачу скрыні для ахвяравання ў прытулкі для жывёлы, уношу свой уклад, перадавала і корм у прытулак у Баранавіцкім раёне. Магчыма, і ў нашым раёне можна было б стварыць такі. Думаю, што трэба прымаць меры за жорсткія адносіны да братоў нашых меншых, а частку з сум штрафаў выдаткоўваць на зарплату работнікаў прытулкаў, ветурачоў.
Віктар Пятровіч:
— Чаго іх шкадаваць? Мой сусед, як толькі сцямнее, свайго сабаку з ланцуга спускае, і той пайшоў па агародах гойсаць. На ўсе скаргі ў мужчыны адзін адказ: жывёле хоць калі воля патрэбна, не днём жа яго спускаць, каб каго-небудзь пакусаў. Можна падумаць, ён вечарам ці раніцай не ўкусіць?! Павінна быць служба, якая адлоўлівае сабак на вуліцах. А калі знаходзяць гаспадара, то каб прымалі да яго самыя жорсткія меры – ад штрафу да арышту, хоць на некалькі сутак. Другі раз думаў бы, перш чым спусціць сабаку ці выкінуць.
Таццяна ГЕРАСІМОВІЧ, маладая маці:
— Калі сумна, раяць абняць ката: цяпер сумна не толькі вам, але і кату… Гумар гумарам, аднак, усіх катоў абняць нельга. Часта гуляю з дачушкай у парку, скверы ля фантана, па вуліцах горада і бачу мноства і катоў, і сабак. Дамашніх відаць адразу – чыстыя, дагледжаныя. Але нямала і бадзяжных, яны не баяцца падыходзіць да людзей. Як тут не дастаць з сумкі што-небудзь і не пачаставаць галодных. Дачушка, калі збіраемся на прагулку, з дзіцячай непасрэднасцю просіць: “Мама, а коціку ням-ням палажыла ў сумку?”.
Чалавек павінен заставацца чалавекам пры любых абставінах.
Нет сил молчать. Одна надежда на помощь газеты. Как можно быть такими бездушными и жестокими к домашним животных? Уже не первый раз в подвале дома №23 по улице Чкалова кто-то убивает маленьких котят … Причем, не вызывает сомнения страшная жестокость. Будто палач (иначе не назовешь) наблюдает за пытками бедного существа. Не буду называть обстоятельства, выдержать трудно — не для слабых нервов. Неужели это невозможно остановить ?! Куда обращаться ?! К участковому? В коммунхоз? А может нужно создать общество защиты бездомных животных? Неравнодушные люди, откликнитесь! Все любят рассуждать на высокие темы, а тут натуральная дикость. И кто же его совершил … Страшно.