Казка з карысным працягам. З 17 кастрычніка па 11 лістапада ў краіне праходзіць рэспубліканская пажарна-прафілактычная акцыя “За бяспеку разам” /фота/
Тое, што з надыходам ацяпляльнага сезона ўзрастае рызыка ўзнікнення надзвычайных сітуацый, даказвае штогадовая статыстыка пажараў. Для іх прафілактыкі і папярэджання гібелі людзей з 17 кастрычніка па 11 лістапада ў краіне праходзіць рэспубліканская пажарна-прафілактычная акцыя “За бяспеку разам”. Акрамя выратавальнікаў, у ёй актыўна ўдзельнічаюць супрацоўнікі міліцыі, педагогі, сацыяльныя работнікі, камунальнікі і нават артысты.
З захапленнем успрынялі тэматычны спектакль “Казка пра непаслухмяную запалку” выхаванцы гарадскіх дзіцячых садкоў і пачаткоўцы школ райцэнтра. З прадстаўленнем у ГДК у мінулую сераду прыехаў Брэсцкі тэатр лялек. Дарэчы, са спектаклем, пастаўленым па заказе абласнога ўпраўлення МНС, брэсцкія акцёры-лялечнікі гастралююць па ўсёй вобласці. Гэты праект падтрымаў і Брэсцкі аблвыканкам.
Пасля прадстаўлення начальнік раённага аддзела па надзвычайных сітуацыях Валерый Равінскі расказаў хлопчыкам і дзяўчынкам, чаму небяспечна гуляць з агнём, нагадаў правілы пажарнай бяспекі. А наперадзе рабят чакала цікавая сустрэча з супрацоўнікамі РАНС. Каля ГДК выстраілася тэхніка, якая выкарыстоўваецца пры тушэнні пажараў і ліквідацыі надзвычайных сітуацый. Выратавальнікі прадэманстравалі юным гледачам яе ў дзеянні. Такая прэзентацыя захапіла рабят не менш, чым лялечны спектакль.
Галіна КАНЬКО.
Фота Сяргея ВАРАНОВІЧА.