Сустрэчы, якія дораць цяпло
Ветэран Вялікай Айчыннай вайны Уладзімір Тамашук прымае віншаванні з Днём Перамогі
4 мая ў доме № 15 па вуліцы Кастрычніцкай у Ляхавічах было шмат гасцей. У цэнтры ўвагі гаспадар – ветэран Вялікай Айчыннай вайны Уладзімір Тамашук. Павіншаваць земляка са святам Вялікай Перамогі прыехалі прадстаўнікі ўлады, раённага савета ветэранаў, БРСМ і “Белай Русі”, прафсаюза. Начальнік упраўлення па працы, занятасці і сацыяльнай абароне райвыканкама Леанід Калбаса разам з найлепшымі пажаданнямі перадаў ветэрану віншавальную паштоўку ад кіраўніцтва раёна і матэрыяльную дапамогу з раённага бюджэту. А навучэнцы Ляхавіцкага дзяржаўнага аграрнага каледжа ўручылі кветкі і салодкія пачастункі.
Прадстаўнічая дэлегацыя з віншаваннямі завітала і па іншых адрасах, дзе жывуць шаноўныя ветэраны.Такія сустрэчы нясуць цяпло і радасць і тым, хто набліжаў Перамогу, і сённяшнім пакаленням, якія маюць магчымасць сказаць героям шчыры дзякуй за шчаслівае жыццё ў свабоднай і незалежнай Беларусі.
Сёлета на маршруце традыцыйнага каледжскага аўтапрабегу “Дарогамі вызваліцеляў» адным з першых прыпынкаў памяці і пашаны стала брацкая магіла на скрыжаванні вуліц Леніна і Кастрычніцкай у райцэнтры. Кветкі, вянкі ляглі да іншых помнікаў загінуўшым у гады той вайны. Застылі ў мінуце маўчання ветэраны і моладзь. А пачалося ўсё з ініцыяванага БРСМ дыялогу пакаленняў “Кветкі Вялікай Перамогі”, які адбыўся ў ЛДАКу.
У гэтыя перадсвяточныя майскія дні прадстаўнікі мясцовай улады, грамадскіх арганізацый, валанцёры, піянеры і цімураўцы – частыя госці ў кватэрах і дамах удзельнікаў і сведкаў ваенных падзей. У іх адрас гучаць пажаданні здароўя, доўгіх гадоў жыцця, міру і ладу ў сем’ях. Кожнаму ветэрану адрасуецца і матэрыяльная дапамога з нагоды чарговай гадавіны Вялікай Перамогі. Сёлета агульная сума выплат з мясцовага бюджэту на гэтыя мэты склала 6100 рублёў.
Ушанаванні ветэранаў і падрыхтоўка да святочных урачыстасцяў праходзяць гэтымі днямі па ўсёй краіне.
Галіна КАНЬКО.
Фота Сяргея ВАРАНОВІЧА.
У ТЭМУ
Беларускі рэспубліканскі саюз моладзі ініцыяваў правядзенне з 4 па 9 мая ва ўсіх рэгіёнах дыялогу пакаленняў «Кветкі Вялікай Перамогі».
Патрыятычны праект стаў не толькі лагічным прадаўжэннем «Адкрытага дыялогу», які Саюз моладзі рэалізуе з 2014 года, але і адным з цэнтральных мерапрыемстваў рэспубліканскага патрыятычнага праекта «Кветкі Вялікай Перамогі».
