Арыфметыка “Ляхавіцкага”
Усяго ў некалькіх кіламетрах ад горада раскінуліся ўраджайныя пшанічныя палі СВК «Ляхавіцкі». Беражліва падхоплівае налітыя каласы жатка «ДжонДзіра». За штурвалам камбайна Генадзій Граблюк. Дачка Марта – вось ужо на працягу шасці сезонаў яго нязменная памочніца, уважліва сочыць за якасцю работы: не павінен прапасці ніводны каласок.
– Як атрымаў 11 гадоў назад гэты агрэгат, так і жнём разам: старшы камбайнер Граблюк і «ДжонДзір». Марта малайчына. Хутка асвоіла механізатарскую справу. Першы год крыху баялася, а цяпер лепш іншага прафесіянала спраўляецца, – гаворыць старшы камбайнер і бацька ў адной асобе.
Хлебаробскую біяграфію дзяўчына пачынала студэнткай Баранавіцкага дзяржаўнага ўніверсітэта. На канікулах замест адпачынку выбірала поле, дзе працавала нароўні з іншымі механізатарамі: ніякай скідкі на маладосць і прыналежнасць да прыгожай паловы. І цяпер інжынер па падрыхтоўцы кадраў Ляхавіцкага лясгаса Марта Генадзьеўна Граблюк у свой працоўны водпуск кабінет мяняе на жніўныя палеткі – дапамагае землякам убіраць вырашчаны ўраджай. Успамінае хваляванне першага жніва і заўсёдную ўпэўненасць, што бацька дапаможа, падтрымае, падкажа. А сёння і сама дзяўчына можа параіць – вопыт мае.
Па стане на 11 жніўня гэты сямейны экіпаж намалаціў 520 тон зерня. Дарэчы, магчыма праз год-другі выйдзе на жніўныя палі за штурвалам камбайна ці за рулём аўтамабіля яшчэ адзін Граблюк: 18-гадовы Вадзім пакуль вучыцца на механіка ў Жыровічах.
Бункер запоўнены, і праз лічаныя хвіліны каля камбайна – МАЗы. За рулём Аляксандр Вайцешык і Генадзій Тумаш.каля хутара з дзіўнай назвай Козачка шчыруе каманда ў складзе старшага камбайнера Мікалая Кавалёва і камбайнера Сяргея Шпака. Разам яны працуюць трэці сезон. Намалочваюць па 60-70 тон за дзень.
Сёлета, калі «Ляхавіцкі» толькі распачынаў сяўбу, галоўны аграном Аляксандр Шымкевіч заўважыў:
– Прыгожыя азімыя ўзышлі – на радасць. Калі і яравыя будуць такімі ж, можна спадзявацца на добры ўраджай.
Спадзяванні спраўдзіліся.
– Пра такую пшаніцу, як «сюіта», некалі толькі марылі. Для нашай глебы самае тое. Калі пачынаў працаваць у «Ляхавіцкім» 40 гадоў назад, ураджайнасць была 12 цэнтнераў на круг, цяпер маем 50 – адчуйце розніцу. Вось што значыць новыя тэхналогіі, выдатнае насенне, сучасная механізацыя, – расказвае брыгадзір Іван Юнік. І дадае наконт зялёна-жоўтых палеткаў аўса, што побач:
– Давялося падсяваць. Цяжкавата будзе ўбіраць нераўнацэнныя па спеласці ўчасткі.
Усяго на жніве ў гаспадарцы задзейнічаны 8 камбайнаў, 18 аўтамабіляў. Такая колькасць уборачнай тэхнікі, поўная ўкамплектаванасць кадрамі механізатараў дазваляюць у аптымальныя тэрміны ўбраць ураджай.
Што датычыць хлебаробаў, то яны справу сваю ведаюць. Прозвішчы многіх камбайнераў, вадзіцеляў, аператараў зернесушыльных комплексаў вядомыя ў раёне і за яго межамі: Кардаш, Асланян, Алейнікаў, Юнік, Герасімовіч, Ракашэвіч…
– Стараюцца ўсе, бо разумеюць: у гэты час кожная хвіліна дарагая. Да таго ж, больш намалоціш ці перавязеш – больш заробіш. Простая арыфметыка, – гаворыць старшыня СВК «Ляхавіцкі» Іван Вітко.
Позна вечарам, калі механізатары ідуць на адпачынак, за справу бяруцца бухгалтары: падлічваюць зробленае за дзень. Назаўтра кожны хлебароб можа з табеляў, вывешаных на зернетаку і мехдвары, даведацца пра свой вынік, параўнаць з вынікам калег. Умовамі спаборніцтва ў сельгаскааператыве прадугледжаны бонусы за хуткую, якасную і без парушэнняў тэхнікі бяспекі ўборку.
Арганізавана і двухразовае харчаванне ўдзельнікаў жніва (пра гэта «ЛВ» расказваў у папярэднім нумары).
На мехдвары работа кіпіць зрання. Механізатары правяраюць тэхніку – у полі важная любая дробязь. Здарылася паломка, якую камбайнеры не могуць ухіліць самастойна, – на дапамогу прыходзіць мабільная рамонтная група – майстэрня на колах. Галоўны інжынер Андрэй Новік трымае на кантролі і механізмы, і механізатараў.
Каля 200 тон зерня за суткі перапрацоўвае мясцовы ЗСК. Устаноўкай М-819 па чарзе кіруюць вопытнейшыя аператары Анатолій Герасімовіч і Леанід Юнік. Штогод яны сярод лепшых аператараў ЗСК. А сёлета партрэт інжынера па працаёмкіх працэсах СВК «Ляхавіцкі» Анатолія Герасімовіча занесены на раённую Галерэю славы.
Хлебаробам «Ляхавіцкага» трэба ўбраць 1250 гектараў збожжавых. Летась амаль з такой жа плошчы намалацілі 5500 тон. Сёлета, па падліках кіраўніка СВК, будзе не менш. У засеках ужо 4350 тон. Пакуль усё па плане: ураджайнасць адна з лепшых у раёне – 55,2 цэнтнера на круг. У лік дзяржзаказу гаспадарка прадала
750 тон азімай пшаніцы (на 50 тон больш задання).
Яшчэ тыдзень – і ўборка збожжавых у СВК завершыцца. Ужо цяпер пачынаецца падрыхтоўка да сяўбы-2018.
– Эксперы-ментавалі, выбіралі, прыглядаліся, раіліся з навукоўцамі. І прынялі рашэнне: даверым частку палеткаў трыцікале гатунку «дзінаро». Ужо заклалі ў зернясховішча 100 тон яго насення першай рэпрадукцыі, – дзеліцца планамі Іван Вітко.
Галіна КАНЬКО.