Трымаць марку. ЗТАА «БелДан»
Механізатары Іосіф Ламанос і Артур Гутырчык.
Праца па дацкай тэхналогіі з беларускай працавітасцю – гэта пра «БелДан», што прапісаўся недалёка ад Вострава. Прадукцыя агракомплексу – беконная свініна – пастаўляецца ў буйныя гандлёвыя кропкі і на прылаўках не залежваецца.
Замежнае таварыства з абмежаванай адказнасцю трымае марку: калі парода свіней – то лепшая (ландрас, ёркшыр, дзюрок), калі якасць – то вышэйшая, калі тэхналогія – то самая сучасная. Пасеялі для вытворчасці кармоў азімыя пшаніцу і трыцікале. Дарэчы, камбікорм у «БелДане» ўласнага прыгатавання – такая харчовая незалежнасць і бяспека.
Пад яравую сяўбу плануюць выдзеліць прыкладна 3500 гектараў. Дакладна прадумваюць структуру пасеваў. Так, акрамя аўса, кукурузы і ячменю, пасеюць конскія бабы – культуру непатрабавальную, ураджайную.
На сяўбе і ўборцы традыцыйна выдатна працуюць механізатары Артур Гутырчык, Аляксандр Азарчык, Сяргей Гутырчык і Максім Горбік.
– Складана выдзяліць лепшых сярод жывёлаводаў: кожны добрасумленна працуе на вынік, адказвае за свой участак работы, – адзначае дырэктар ЗТАА Мікалай Нікіцін.
Красамоўны факт у вытворчы малюнак: усе заатэхнікі, ветурачы тут маюць вышэйшую адукацыю і не спыняюцца ў прафесійным развіцці.
Наталля ПЕРАПЕЧКА.
Фота Сяргея ВАРАНОВІЧА.
