Жніўнае поле з водарам баршчу. Як харчуюцца гэтым часам хлебаробы, пацікавіўся «ЛВ»
На жніўным полі пахне хлебам і… баршчом. Двойчы на дзень сталоўка пад адкрытым небам разгортваецца на палявых станах літаральна ўсіх сельгаспрадпрыемстваў раёна. Добры работнік – накормлены работнік. Таму каларыйна, смачна і разнастайна пачаставаць удзельнікаў жніва – адна са стратэгічных задач на ўборачнай.
Як харчуюцца гэтым часам хлебаробы, пацікавіўся «ЛВ».
С трога па раскладзе пад’язджае на поле прыстасаваны для перавозкі ежы аўтамабіль (усяго на жніве ў ААТ «Жарабковічы» задзейнічана чатыры адзінкі такой тэхнікі). За рулём вось ужо пяты сезон Ядвіга Сковыш. Тамара Молаш раскладвае па талерках гарачыя пюрэ, катлеты, у якасці вітаміннай дабаўкі – свежыя агурочкі, на дэсерт – кампот. 16 гадзін, хлебаробы запрашаюцца на падвячорак.
– Малайцы, дзяўчаты. Гатуюць смачна, не горш, чым дома, – лічы, у адзін голас сцвярджаюць механізатары.
15-20 хвілін – і зноў за штурвал камбайна ці за руль аўтамабіля, уборка не церпіць прамаруджвання.
На якім бы ўчастку ні шчыравалі тутэйшыя працаўнікі, абеды і падвячоркі сюды дастаўляюцца своечасова і гарачымі. Загадвае кухоннай гаспадаркай Ганна Барташэвіч. Яна разам з чатырма поварамі Святланай Мурочак, Вольгай Папко, Ірынай Грамак, Жаннай Славутай, кухоннымі рабочымі Валянцінай Ашмарынай, Галінай Малахвей, Нінай Мартыненка і Тамарай Молаш гатуюць штодня больш за 400 порцый: 260 абедаў і 170-180 падвячоркаў. Толькі месяц, як жарабковіцкая сталоўка пераехала з аграгарадка ў адрамантаваны за кошт сродкаў ААТ будынак былой школы-сада ў Канюхах. Абсталяванне, посуд – часткова абноўлены, работнікаў сталоўкі штодзённа сюды дастаўляюць спецрэйсам у 7.30 раніцы. Свежым мясам сталоўку забяспечвае гаспадарка. Агародніну закупляюць у фермера, мясныя паўфабрыкаты – на Бярозаўскім мясакансервавым камбінаце. Усё – за кошт сельгаспрадпрыемства. Тыя, хто харчуецца на полі, плацяць за два прыёмы ежы ў дзень сімвалічную суму – усяго 10 капеек.
Сёлетняе жніво – першае ў кар’еры для повара сталоўкі ЗАТ «Белпрампрыбор» Анастасіі Сельмановіч. Дзяўчына толькі нядаўна атрымала адпаведны дыплом. І цяпер з 7 гадзін раніцы пачынае гатаваць ежу для сваіх механізатараў. Ім з Аленай Анціпенка штодня трэба наварыць-насмажыць каля 20 абедаў і столькі ж падвячоркаў.
– Стараецца наша Насця, абеды ў яе – што трэба! Порцыі таксама добрыя, – адзначае камбайнер Міхаіл Зубік.
Абеды для работнікаў сельгаспрадпрыемства таксама амаль што бясплатныя.
Механізатары СВК «Ляхавіцкі» харчуюцца і на сяўбе, і на жніве не горш, чым у рэстаране. 23 гады пра разнастайнасць і якасць іх меню клапоціцца брыгадзір-повар сталовай райпо ў аграгарадку Русінавічы Нэлі Жук. Сёлета штодня неабходна прыгатаваць 90 абедаў і 70-80 падвячоркаў.
– Капілка правераных рэцэптаў, безумоўна, ёсць. Але мы з поварам Таццянай Траяноўскай стараемся то іншую прыпраўку дабавіць, то кропу ці пятрушкі, і вось, лічы, новая страва атрымалася. У механізатараў цікавімся, што ім больш даспадобы. Яшчэ адзін важны сакрэт у прыгатаванні – добры настрой, – гаворыць Нэлі Фёдараўна.
Дарэчы, тут гатуюць стравы не толькі для «Ляхавіцкага», але і для КСУП «Тальмінавічы» – 20-25 абедаў у дзень.
Па дагаворы паміж райпо і ДП «Нача» стравы для механізатараў гэтага прадпрыемства – па 30-35 абедаў і падвячоркаў – гатуе кафэ «Алеся». Што ж у камбайнера з «Начы» на абед? Меню аднаго дня: гарохавы суп, шніцаль, макарона з маслам, салата «папараць-кветка», беляшы з мясам, кампот з фруктаў, хлеб.
Намеснік дырэктара ДП «Нача» Галіна Рамейка расказвае, што абеды з «Алесі» на палявым стане разыходзяцца на ўра. Наведвальнікі сталовай пад адкрытым небам плацяць за харчаванне ўсяго 10 працэнтаў ад кошту, асноўныя траты бярэ на сябе сельгаспрадпрыемства.
Гарачае харчаванне хлебаробаў арганізавана і ў іншых гаспадарках раёна.
Галіна КАНЬКО.
Фота аўтара.