Стратэгічна-смачная акалічнасць, ці Сінонім жыцця ў асобах і тонах
Жніўны марафон, як і належыць, закончаны ў жніўні. На ляхавіцкай хлебнай ніве шчыравалі 70 камбайнаў, каля сотні аўтамабіляў, 24 стацыянарныя і 6 перасоўных зернесушыльных комплексаў. Але самая галоўная, неабходная, нязменная ўмова ўборачнай, яе поспех, яе лёс забяспечвалася, стваралася, гарантавалася суб’ектыўным фактарам у асобах хлебаробаў.
Механізатары, вадзіцелі, работнікі ЗСК, спецыялісты, кіраўнікі працавалі ў гэты гарачы ва ўсіх сэнсах час ва ўзмоцненым рэжыме, не зважаючы на працягласць рабочага дня. Усё падпарадкоўвалася адзінай мэце: убраць да апошняга зярнятка і як мага хутчэй. Чуеце, як важка гучыць гэта, здавалася б, прывычнае сцвярджэнне. У кожнае жніво – па-піянерску!
Перш чым на паліцах харчовых магазінаў з’явіцца найшыкоўнейшая прапанова ад хлебапёкаў (цэлым боханам ці нарэзаным на лустачкі, у цэлафане і без «вопраткі», чорны, шэры, «пякляваны», бездражджавы ці на традыцыйнай заквасцы, з семачкамі і курагой, з кменам і кунжутам… усяго не пералічыш), з пасляжніўя да новага жніва шчыруюць земляробы. А мы потым перабіраем «Нарачанскі», «Зорку гандлю», «Траецкі»,
«Радзівілаўскі», «Водар», «Барадзінскі»… Кожны выбірае сабе па смаку. А вельмі сталыя людзі, якім у цяжкія ваенныя і пасляваенныя часы давялося паспытаць голад, не стамляюцца павучальна паўтараць: хлеб нясмачным не бывае. Хто без ваганняў падтрымае такую перакананасць, дык гэта людзі, якія вырошчваюць золата нашых палёў, для каго месца працы – хлебная ніва.
Яны не майстры прыгожых слоў – яны ў галоўных ролях жыццесцвярджальнага сюжэта, у якім і ў тэксце, і ў кантэксце жыццё і жыта паходзяць з аднаго кораня.
Сёлета хлебаробскі год быў няпростым, і залежала гэта ў большай ступені не ад чалавека – ад прыроды, якая «капрызіла» па поўнай праграме. Тым не менш, каля 38 тысяч тон у амаль мільённым намалоце Брэстчыны Ляхавіцкі раён забяспечыў.
Жніво завершана, уборачная працягваецца. І тэхніка, і людзі робяць сваю спрадвечную справу – забяспечваюць харчовую бяспеку краіны. Святое прызначэнне, вялікая праца. А з выхаднымі пачакаем.
Вольга БАРАДЗІНА.
Фота Сяргея ВАРАНОВІЧА і Маргарыты КУХТА.