Размова на далікатную тэму. На пытанні карэспандэнта «ЛВ» адказала загадчыца жаночай кансультацыі Ляхавіцкай райбальніцы ўрач акушэр-гінеколаг Валерыя Лазарчук

Арганізм жанчыны можна па праве назваць цудам: ​​менавіта ў ім зараджаецца і выношваецца новае жыццё. Ніхто не стане спрачацца з тым, што здароўе будучых пакаленняў залежыць і ад таго, наколькі здаровыя сённяшнія дзяўчынкі, дзяўчаты, жанчыны. Сваё здароўе прыгожая палова давярае «жаночаму доктару» – гінеколагу. Як часта трэба наведваць урача-гінеколага? Як папярэдзіць захворванні? Якія фактары негатыўна ўплываюць на жаночае здароўе? На гэтыя і іншыя пытанні адказала загадчыца жаночай кансультацыі райбальніцы ўрач акушэр-гінеколаг Валерыя Лазарчук.

– Валерыя Генадзьеўна, як часта трэба наведваць гінеколага?

– Нават калі нічога не турбуе, рэкамендую прыходзіць на прафілактычны агляд да ўрача-гінеколага раз у год. Гэтага будзе дастаткова. Пры выяўленні адкланенняў наведваць урача неабходна строга па яго назначэнні.

– Што мае на ўвазе планавы агляд?

– Праверку жаночага здароўя. Гэта неабходна для таго, каб прадухіліць захворванне на ранняй стадыі або пачаць лячэнне.
Пры аглядзе доктар цікавіцца станам жанчыны, скаргамі на пагаршэнне самаадчування.

– Якія фактары негатыўна ўплываюць на рэпрадуктыўнае жаночае здароўе?

– У цэлым на яго ўплывае ўсё наша жыццё, усе навакольныя фактары: экалогія, характар ​​харчавання, выкананне рэжыму сну і адпачынку, лад жыцця, стрэсы, шкодныя звычкі.

– З якімі захворваннямі вы часцей за ўсё сутыкаецеся ў сваёй практыцы?

– Запаленчыя захворванні – кальпіт, сальпінгаафарыты. У маладых жанчын гэта эрозія, у больш сталым узросце – захворванні, звязаныя з узроставымі зменамі (міёма, адэнаміёз, кіста яечнікаў). Многія захворванні могуць справакаваць ускладненні. Таму ўсе захворванні трэба лячыць і, галоўнае, не запускаць.

– Чым пагражае нелячэнне эрозіі?

– Самае страшнае – трансфармацыя эрозіі ў анкалогію. Даказана, што гэта захворванне ў спалучэнні з вірусам папіломы чалавека выклікае перадракавыя працэсы, дісплазію або рак шыйкі маткі.
Калі доўга не назірацца ў гінеколага, можна прыйсці на прыём не з эрозіяй, а з больш сур’ёзным захворваннем.

– Нараджэнне дзіцяці – самы чаканы і хвалюючы момант у жыцці кожнай жанчыны. Як правільна падрыхтавацца да цяжарнасці і засцерагчы сябе ад нечаканых непрыемнасцяў?

– Любая жанчына, якая адказна падыходзіць да цяжарнасці, за тры  месяцы да яе планавання павінна абследавацца ў тэрапеўта і стаматолага, здаць аналізы і выканаць іншыя рэкамендацыі ўрача. Калі цяжарнасць нечаканая, не трэба хвалявацца – звяртайцеся да гінеколага. Медыкі дапамогуць і зробяць усё магчымае, каб цяжарнасць працякала без ускладненняў. А каб не ўзнікла праблемных момантаў, якія вядуць да страшнага слова «аборт», існуе кантрацэпцыя. Для кожнай жанчыны ўрач-гінеколаг парэкамендуе аптымальны варыянт.

– Зараз у модзе вузкія джынсы, часта з заніжанай пасадкай. У трэндзе нізкакаларыйныя дыеты. Ці сумяшчальна ўсё гэта са здаровым ладам жыцця?

– Адзенне і бялізна, якія занадта аблягаюць і ўразаюцца ў цела, не прынясуць нічога добрага для здароўя. У прыхільніц такіх модных тэндэнцый магчымы праблемы ў выглядзе запаленчых працэсаў мочавыдзяляльных шляхоў, нырак, жаночых палавых органаў.

«Нездаровае» захапленне дыетамі таксама цягне за сабой парушэнні жаночага здароўя. Харчаванне павінна быць збалансаваным.

– Да якіх функцыянальных змен у арганізме павінна быць гатова жанчына з улікам узросту?

– Пагаворым пра наступленне менапаўзы. У кожнай жанчыны ўсё  індывідуальна: перапады артэрыяльнага ціску, нерэгулярны менструальны цыкл, слабасць, змяненні настрою і інш.

Для некаторых жанчын гэты перыяд праходзіць з мінімальнымі нязручнасцямі.  Павярнуць назад такія змены ў арганізме немагчыма, а вось зняць сімптаматыку можна. Для гэтага трэба звярнуцца да ўрача-гінеколага, які назначыць прэпараты (раслінныя або гарманальныя), раскажа, як прывесці самаадчуванне ў норму. Галоўнае, не заставацца сам-насам са сваёй праблемай.

Пажаданні зямлячкам ад урача-гінеколага Валерыі Лазарчук

Усім жанчынам жадаю, у першую чаргу, быць здаровымі, радавацца жыццю, мець мару, сілы і жаданне яе рэалізаваць. Любіце сябе. А гэта значыць, у тым ліку, і звяртайцеся да ўрача своечасова і пры першай неабходнасці, не займайцеся самалячэннем. Памятайце, што здароўе – гэта і ваша прыгажосць, і ўпэўненасць у заўтрашнім дні, і добры настрой, і энергія для мноства спраў і клопатаў, што кладуцца на плечы кожнай жанчыны.
Асобную параду хочацца даць мамам дзяўчынак. Праводзьце час са сваёй дачкой, цікаўцеся, чым яна жыве. Менавіта маці павінны вучыць дачку розным аспектам жаночага здароўя – ад гігіены да папярэджання незапланаванай цяжарнасці.
Усім землячкам жадаю стаць шчаслівымі мамамі здаровых дзетак.

Гутарыла Ірына КУЗЬМІЧ.
Фота аўтара.