Ляхавічы:прайсціся па горадзе пешшу

Увогуле наш горад прыгожы і дагледжаны. Але ёсць нюансы. За «прыкладамі» далёка хадзіць не трэба.

Менавіта такі просты і “інфармацыйны” метад вывучэння санітарнага стану горада, парадку ў скверах, дварах, ля аўтобусных прыпынка і г. д. — проста прайсціся па горадзе пешшу – прапанаваў старшыня райвыканкама Вячаслаў Сельмановіч кіраўнікам і адказным за гэты парадак асобам. Кветкамі і іншымі эстэтычнымі прыкметамі добраўпарадкавання любавацца не будзем. Убачым тое, што адлюстраваў аб’ектыў фотакара газеты: імправізаваныя сметнікі, непадкошаная тэрыторыя (у даным выпадку ля кааператыўных дамоў, а, значыць, у адказе за гэта самі жыхары), “пераблытаныя” кімсьці кантэйнеры для паасобнага збору смецця, раскіданыя па газонах і ў скверы пакеты ад цукерак, марожанага, чыпсаў, бутэлькі ад мінералкі і бясконцыя недакуркі ўздоўж тратуараў, вакол лавачак. Думаецца, што такія фрагменты беспарадку павінны хваляваць ці не ў першую чаргу тых, хто займаецца выхаваннем нашых рознаўзроставых землякоў. Так-так, выхаванне – працэс бясконцы: цукерачны фанцік кінула пад ногі дзіцё, а вось бутэльку ад спіртнога ля фантана “забыліся” дарослыя…

Канешне, падтрыманне парадку ў горадзе, у першую чаргу, клопат спецыяльных службаў. Тон задаюць камунальнікі, у дапамогу ім практычна ўсе працоўныя калектывы і ў ідэале – усё насельніцтва. Толькі ідэальны варыянт пакуль бачыцца аддаленым, пра што і сведчыць аб’ектыўны аб’ектыў. І патрабаванне кіраўніка раёна, якое датычыць навядзення і падтрымання парадку ва ўсіх населеных пунктах, на ўсіх тэрыторыях, застаецца задачай дня. Тым больш, што свята сапраўднае блізіцца, – новы год навучальны. Чым не стымул?!

Паасобны збор смецця некаторыя жыхары вул. Будаўнікоў разумеюць так.

Слова “парадак” на апаратнай нарадзе гучала і з іншай нагоды – у дачыненні да гандлёвага абслугоўвання, арганізацыя якога патрабуе радыкальных перамен.

Не ўпершыню рабілася справаздача аб ходзе нарыхтоўкі другаснай сыравіны. Начальнік аддзела жыллёва-камунальнай гаспадаркі райвыканкама Ірына Грынялевіч гаварыла аб мерапрыемствах, якія павінны паспрыяць выкананню задання. Размова на тэму будзе працягвацца на наступнай апаратнай нарадзе – пытанне знаходзіцца пад пастаянным кантролем кіраўніцтва раёна.

Намеснік старшыні райвыканкама Дзіяна Трысцень дакладвала аб ходзе выканання Дэкрэта № 18, рабоце з так званымі абавязанымі асобамі і пагашэнні імі запазычанасці перад дзяржавай. Тут існуе шэраг праблем, найбольш – суб’ектыўнага характару. Пра іх і вялася дэталёвая размова.

Але вернемся да блізкага 1 верасня. Такая жыццесцвярджальная аптымістычная падзея – пачатак новага навучальнага года. Яна павінна быць радаснай для ўсіх хлопчыкаў і дзяўчынак. Не толькі сям’я за гэта ў адказе – дзяржава клапоціцца шчыра і важка. Важна, каб усе мы, дарослыя, усвядомілі, што чужых дзяцей не бывае, і дапамаглі стварыць радасць для нашых юных землякоў. Спяшайцеся рабіць дабро!

Вольга БАРАДЗІНА.

Фота Сяргея ВАРАНОВІЧА.

Ля былога будынка райпо па вул. Цітовіча.

Ля кааператыўных дамоў па вул. Кальцавой.